तम्घास । गुल्मीमा बाढी र पहिरोले कम्तीमा सात जनाको मृत्यु भएको छ । दुर्गमका गाविसमा गएको बाढी र पहिरोको यकिन तथ्यांक आउन कठिन भएको पनि बताइएको छ ।
गैंडाकोट गाउँ विकास समिति वडा नम्बर ७ मा घरको गोठ पुरिंदा आमाछोरीको मृत्यु भएपछि मृतकको संख्या सात पुगेको हो ।
यसअघि गुल्मीको हस्तीचौर गाविसको मल्दीमा राति ११ बजे पहिरो जाँदा तीन जनाको मृत्यु भएको थियो। स्थानीय भीमबहादुर दर्जीको घर पहिरोले पुर्दा भीमबहादुरकी श्रीमती, दिदी र बुहारीको घटनास्थलमै मृत्यु भएको गुल्मी जिल्ला प्रहरी कार्यालयका डिएसपी महेन्द्र पालले जनाएका छन् ।
सो क्षेत्रका १५÷२० घर पहिरोको जोखिममा रहेकाले स्थानीयलाई सुरक्षित स्थानमा रहन पनि प्रहरीले सचेत गरेको छ । अविरल वर्षा जारी छ ।
यता, गुल्मीकै विशुखर्क–९ मा पहिरोले एक घर पुरिँदा दुई जनाको मृत्यु भएको छ । मृत्यु हुनेमा गोपाल रानाका ८ वर्षे छोरा र ६ वर्षे छोरी हुन् । एक जना घाइतेलाई उपचारका लागि जिल्ला अस्पताल तम्घास ल्याइएको छ ।
त्यस्तै अबिरल बर्षासँगै बडीघाट खोलामा आएको बाढीले गुल्मीको क्षेत्र नम्बर १ का विभिन्न बस्तीमा कटान शुरु गरेपछि खोला आसपासका वासिन्दा विस्तापित भएका छन् ।
चोरकाटे बजारमासमेत बाढीले वितण्डा मच्याएको जनाइएको छ ।
पहिरोले पाल्पा र मकवानपुरमा पनि मंगलबार बिहान एक एक जनाको मृत्यु भएको छ ।
