काठमाडौँ। व्यवस्थापिका संसद्, अन्तर्राष्ट्रिय सम्बन्ध तथा श्रम समितिको आजको बैठकमा गोकर्ण रिसोर्टको सेयर ‘एलएम सुविर ब्रदर्स’ (नेपाल) ले ‘यति होल्डिङ्स’का नाममा हस्तान्तरण गरेका विषयमा छलफल भएको छ ।
छलफलमा नेपाल ट्रस्टको कार्यालयका कार्यकारी सचिव भीमप्रसाद उपाध्यायले ब्रदर्सले सेयर हस्तान्तरण ढिला भयो भनी अख्तियार दुरुपयोग अनुसन्धान आयोगमा उजुरी गरेपछि पत्र प्राप्त भएको र प्रक्रिया अनुसार नै सेयर हस्तान्तरण भएको बताए ।
कानुन, न्याय तथा संसदीय मामिला मन्त्रालयका सचिव टेकप्रसाद ढुङ्गानाले विदेशी कम्पनी नेपालमा दर्ता भए पनि सेयर निष्काशन गर्ने अधिकार नहुने बताए ।
सो विषयमा थप छलफल गर्नुपर्ने भएकाले आगामी बैठकमा सरोकार भएकाहरुलाई बोलाएर निष्कर्षमा पुगिने सो अवसरमा जानकारी गराइयो । रासस
