काठमाडौं । विश्व फुटबलको सर्वोच्च निकाय फिफाले फिफा वर्ष खेलाडी अवार्डका लागि मनोनित अन्तिम तीन खेलाडीको नाम सार्वजनिक गरेको छ । फिफाले अवार्ड अन्तर्गत वर्ष पुरुष खेलाडीका लागि लियोनल मेस्सी, रोबर्टो लेवान्डोस्की र मोहमद सलाह परेका छन् ।
अर्जेन्टाइन स्टार स्ट्राइकर मेस्सी फ्रेन्च क्लब पेरिस सेन्ट जर्मेनबाट खेल्ने गर्छन् । पोलिस स्टार स्ट्राइकर खेलाडी लेवान्डोस्की जर्मन क्लब बायर्न म्यूनिखबाट खेल्ने गर्छन् । इजिप्सियन स्टार स्ट्राइकर सलाह इङ्गलिश क्लब लिभरपुलबाट खेल्ने गर्छन् ।
त्यस्तै वर्ष खेलाडी महिलातर्फ साम केर, जेनिफर हेर्मोसो र एलेक्सिया पुटेलास परेका छन् । वर्ष पुरुष प्रशिक्षकको अन्तिम मनोनयनमा पेप ग्वार्डियाला, रोबर्टो मान्सिनी र थोमस टुचेल रहेका छन् ।
महिला प्रशिक्षकतर्फ लुइस कोर्टेस, एम्मा हाएस र सरिना विग्मान रहेका छन् । वर्ष गोलकिपर अवार्डका लागि म्यानुएल नुएर, इडुवार्ड मेन्डी र जियानलुगी डोनारुम्मा परेका छन् ।
त्यस्तै वर्ष उत्कृष्ट गोल पुस्कास अवार्डका लागि एरिक लामेला, प्याट्रिक सिच र मेहदी तारेमी परेका छन् ।
