- सुन चाँदी दर
- विनिमय दर
- नेपाली पात्रो
- राशिफल
काठमाडौं । इङ्गलिश प्रिमियर लिग क्लब एभर्टनको प्रशिक्षक सम्हाल्न पुगेको पहिलो खेलमै फ्रयाङ्क लम्पार्डले टिमलाई जिताएका छन् । महत्वपूर्ण खेलमा उनले एभर्टनलाई एफए कप फुटबलको पाँचौं चरणमा पुर्याउन सफल भएका हुन् ।
शनिबार राति भएको खेलमा ब्रेन्टफोर्डलाई ४–१ गोल अन्तरले हराउँदै एभर्टन पाँचौं चरणमा पुगेको हो । एभर्टनको जितमा एरी मिना, रिचार्लिसन, मासन होल्गेट र एन्ड्रोस टाउनसेन्डले एक एक गोल गरे । ब्रेन्टफोर्डका इभान टोनीले एक गोल फर्काए ।
लम्पार्ड यसअघि प्रिमियर लिग क्लब चेल्सीबाट हटाइएका थिए । उनी चेल्सीकै खेलाडी थिए । तर यसपालिको इनिङ्स भने राम्रो हुने लक्षण ल्याएका छन् ।
अन्य खेलको नतिजा
चेल्सी र म्यानचेस्टर सिटी पनि पाँचौं चरणमा पुगेका छन् । चेल्सीले प्लाइमाउथलाई २–१ ले तथा म्यानचेस्टर सिटीले फुल्हमलाई ४–१ ले पराजित गर्दै पाँचौं चरणमा स्थान बनाएको हो ।
क्रिस्टल प्यालेस, वेष्ट ह्याम युनाइटेड, हडर्सफिल्ड टभाउन, पिटरब्रो युनाइटेड, साउथह्याम्पटन, स्टोक सिटी, नर्विच सिटी र लुटन टाउन पनि विजयी हुँदै पाँचौं चरणमा पुगेका छन् ।
त्यस्तै ब्राइटन एण्ड हभ आल्बियनलाई ३–१ ले हराउँदै टोटनह्याम हट्सपर पनि एफए कपको पाँचौं चरणमा पुगेको छ । टोटनह्यामलाई जिताउन ह्यारी क्यानले २ गोल गरे । एक गोल आत्मघातीका रुपमा सोली मार्चले गरेका थिए ।
यसअघि म्यानचेस्टर युनाइटेडलाई पेनाल्टी सुटआउटमा हराउँदै मिडिल्सब्रो पाँचौं चरणमा पुगेको थियो ।
आजका खेल
चौथो चरणका बाँकी दुई खेलमा आज साँझ ५ः४५ बजे लिभरपुलले कार्डिफ सिटीसँग तथा राति ९ः४५ बजे नटिङ्घम फरेस्टले लेस्टर सिटीसँग खेल्नेछ ।