- सुन चाँदी दर
- विनिमय दर
- नेपाली पात्रो
- राशिफल
काठमाडौं । इङ्गलिश प्रिमियर लिग फुटबलमा क्रिष्टियानो रोनाल्डो नचल्दा म्यानचेस्टर युनाइटेड बराबरीमै रोकिएको छ । मंगलबार राति भएको खेलमा म्यानयु पुछारको बर्नलीसँग १–१ गोलको बराबरीमा रोकिएको हो ।
सबैभन्दा कमजोर टिमसँग खेलेको भए पनि शुरुआती अग्रता जोगाउन नसक्दा म्यानयु बराबरीमै समेटिनु परेको हो । १८ औं मिनेटमा पाउल पोग्बाले गोल गर्दै म्यानयुलाई शुरुआती अग्रता दिलाएका थिए ।
पहिलो हाफसम्म अग्रता कायमै राखेको म्यानयुले ४७ औं मिनेटमा जे रोड्रिगेजले गोल गरेपछि भने बराबरी भयो । यो खेलमा म्यानयुले सतप्रतिशत खेल्ने अपेक्षा गरिएको थियो ।
मंगलबारका अन्य खेलमा न्यूकासल युनाइटेडले एभर्टनलाई ३–१ ले तथा वेष्टह्याम युनाइटेडले वाटफोर्डलाई १–० ले हरायो ।
अंक तालिका
यो खेलपछि २३ खेलबाट ५७ अंकसहित म्यानचेस्टर सिटी शीर्ष स्थानमा कायमै छ । दोस्रो स्थानको लिभरपुलको २२ खेलबाट ४८ अंक छ ।
तेस्रो स्थानको चेल्सीको २४ खेलबाट ४७ अंक छ । चौथो वेष्टह्यामको २४ खेलबाटै ४० अंक छ । पाँचौं म्यानयुको २३ खेलबाट ३९ अंक छ ।
छैटौं आर्सनलको २१ खेलबाट ३६ अंक छ । सातौं टोटनह्याम हट्सपरको २० खेलबाट ३६ अंक छ ।
पुछारका बर्नली, वाटफोर्ड र नर्विच सिटीको क्रमशः १४, १५ र १६ अंक छ ।