रियो। रियो ओलम्पिक खेलकुद अन्तर्गत पुरूष फुटबलतर्फ समुह चरणको दोस्रो खेलमा आयोजक ब्राजिलले इराकसँग गोलरहित बराबरी खेलेको छ। सोमबार बिहान भएको खेलमा ब्राजिलले इराकसँग गोलरहित बराबरी खेलेपछि ब्राजिलका समर्थकहरू टिमसँग रूष्ट देखिएका छन्।
ब्राजिलले पहिलो खेलमा दक्षिण अफ्रिकासँग पनि गोलरहित बराबरी खेलेको थियो। “हामीले हाम्रो समर्थकहरू र ब्रासिलियाको जनतासँग माफी माग्नुपर्छ,” ब्राजिलका टिम म्यानेजर रोजेरियो मिकालिले भने- “हामीले राम्रो फुटबल खेलेनौं। यस्तो लाग्दैछ हामीले हाम्रो समर्थकलाई खुशी पार्न सकिएन।“
ब्राजिलले अर्को खेल डेनमार्कसँग अगष्ट ११ मा खेल्नेछ। अन्य खेलहरूमा नाइजेरियले स्वीडेनलाई १-० र पोर्चुगलले होन्डुरसलाई २-१ गोल अन्तरले पराजित गरेको छ। यस्तै डिफेन्डिङ च्याम्पियन मेक्सिकोले फिजीलाई ५-१ र अर्जेनटिनाले अलजेरियालाई २-१ गोल अन्तरले पराजित गरेको छ।
जर्मनीले भने दक्षिण कोरियासँग ३-३ गोलको बराबरी खेलेको छ।
