काठमाडौँ । सप्तरीको तिलाठी आसपासका बाढीपीडितको स्वास्थ्योपचारका लागि डां गोविन्द केसीलाई पछ्याउँदै डा. भोला रिजालको टोली समेत त्यहाँ पुग्यो ।
बाढीपीडितलाई राहत वितरण गर्न काठमाडौँबाट गएको विशेषज्ञ चिकित्सकको टोलीले स्वास्थ्य जाँचसमेत गरेको छ । यद्यपि, यो चिकित्सक टोली जानु भन्दा पहिले डा. गोविन्द केसीले घर–घरमा गएर त्यहीँको स्थानीय भाषामा कुरा गर्दै उपचार गरेका थिए ।
बाढीपीडितको स्वास्थ्योपचारका लागि भोला रिजाल नेतृत्वको विशेषज्ञ टोली शुक्रबार सप्तरी गएको थियो । शुक्रबार र शनिबार दुई दिन शिविर सञ्चालन गरी सात सय बाढीपीडितको स्वास्थ्य जाँच गरेको छ । टोली आइतबार काठमाडौँ फर्किएको छ ।
जिल्ला प्रशासन कार्यालय सप्तरीको समन्वयमा १५ जनाको टोलीले सप्तरीको तिलाठी गाविसको रम्पुरामल्हनियाँ, सकरपुरा र बेल्ही गाउँका बिरामीको उपचार गरेको वरिष्ठ चिकित्सक तथा नाक, कान, घाँटी रोग विशेषज्ञ डा. अनिलकुमार झाले जानकारी दिए ।
उनका अनुसार स्वास्थ्य परीक्षण गर्न आउनेमा महिला र वृद्धवृद्धा बढी थिए । टोलीले बाढीपीडित जनतालाई खाद्यान्नसहितको राहत सामग्री समेत वितरण गरेको छ ।
