पोखरा । पोखरा महानगरमा गठबन्धनका मेयर उम्मेदवार धनराज आचार्य र उपमेयरका उम्मेदवार कोपिला रानाभाटले अग्रता बढाउँदै लगेका छन् ।
पोखरामा मङ्गलवार बिहान ९ बजेसम्ममा २० हजार ६६० मत गणना भएको छ । जसमा मेयर उम्मेदवार आचार्यले एमालेका कृष्ण थापासँग १२ सय ८५ मतले अग्रता लिएका छन् ।
आचार्यले ८५ सय ६३ मत ल्याएर अग्रता हासिल गर्दा एमालेका थापाले ७२ सय ७८ मत ल्याएका छन् ।
यस्तै, उपमेयर पदमा रानाभाटले एमालेकी मञ्जुदेवी गुरुङसँग ६१५ मतले अग्रता हासिल गरेकी छन् । रानाभाटले ८८ सय ७६ र गुरुङले ८२ सय ७१ मत ल्याएकी छन् ।
यस्तै, पोखराको मेयरमा राप्रपाका शङ्कर खरलाले एक हजार २७ मत प्राप्त गरेका छन् ।
पोखरामा हालसम्म एमालेले वडा नं. १ को अध्यक्षमा मात्रै जित हासिल गरेको छ । यो वडा एमालेले २०७४ को निर्वाचनमा पनि जितेको थियो ।
वडा नं. २, ३, ४, १२ र २३ मा कांग्रेसका उम्मेदवार विजयी भएका छन् । यी वडा कांग्रेसले यसअघि जितेका थिए ।
हाल पोखरा वडा नं. ५, १३, २४, २५ र २६ को मतगणना भइरहेको छ । पोखरामा दुई लाख सात हजार ७१२ मतदाता रहेकोमा एक लाख ४३ हजार २२६ (६८.९६ प्रतिशत) मत खसेको थियो ।
