-
-
-
-
इलाम । इलाम नगरपालिकाको प्रमुख र उपप्रमुखमा नेपाली कांग्रेस विजयी भएको छ । तीस वर्षपछि इलाममा कांग्रेस फर्कने क्रममा नगरप्रमुखमा केदार थापा निर्वाचित भएका हुन् । मेयरमा निकटतम प्रतिद्वन्द्वी नेकपा एमालेका धिरेन चेम्जोङलाई हराउँदै थापा निर्वाचित भएका हुन् ।
थापाले १३ हजार १ सय १५ मत प्राप्त गरे भने एमालेका चेम्जोङले १० हजार ५ सय ८७ मत ल्याए । उपप्रमुखमा कांग्रेसकै विष्णु दाहाल लिम्बूले विजय प्राप्त गरिन् । उनले १३ हजार ५ सय ४२ मत प्राप्त गरिन् । निकटतम प्रतिद्वन्द्वी एमालेकी सीतादेवी रिजालले १० हजार ८८ मत ल्याएकी छिन् ।
२०४८ सालको स्थानीय निर्वाचनपछि इलाम नगरपालिकामा नेपाली कांग्रेसले पहिलो पटक जित हासिल गरेको हो । इलाममा रहेका १२ वटा वडामध्ये ९ वटामा कांग्रेसले वडाध्यक्ष जितेको छ भने ३ वटामा एमाले विजयी भएको छ ।
