सरकारी छाप तथा कर्मचारीको दस्तखत किर्ते गर्ने युवक पक्राउ

हाम्रा कुरा

प्रकाशित २०७९ जेठ ६ शुक्रबार

तनहुँ । जिल्ला प्रहरी कार्यालय तनहुँले सरकारी छाप तथा कर्मचारीको दस्तखत किर्ते गरेको अभियोगमा एक युवकलाई पक्राउ गरेको छ ।

पक्राउ पर्नेमा तनहुँको म्याग्दे गाउँपालिका वडा नं. ७ का २७ वर्षीय रुद्र गदाल रहेका छन् । गदल व्यास नगरपालिका वडा नं. २ कालिकामार्गस्थित ग्यालेक्सी कम्प्यूटर एण्ड आइटी सेन्टर संचालन हुन् । उनलाई बिहीबार दिउँसो पक्राउ गरिएको तनहुँ प्रहरी प्रवक्ता युवराज खड्काले जानकारी दिए ।

डिएसपी खड्काका अनुसार गदलले वैदेशिक रोजगार न्यायाधिकरणको छाप तथा कर्मचारीको दस्तखत किर्ते गरी कम्प्युटर माध्यमबाट सक्कली सरह बनाइ प्रयोगमा ल्याउने गरेका थिए ।

प्रहरीले उनको साथबाट किर्ते बनाउन प्रयोग भएको कम्प्यूटर समेत बरामद गरेको डिएसपी खड्काले बताए । उनीमाथि सरकारी छाप दस्तखत किर्ते मुद्दामा म्याद थप गरी थप अनुसन्धान भइरहेको प्रहरीले जनाएको छ ।