जिल्ला समन्वय समिति कास्कीमा एमालेको प्यानल नै विजयी

हाम्रा कुरा

प्रकाशित २०७९ जेठ २० शुक्रबार

पोखरा । जिल्ला समन्वय समिति कास्कीको प्रमुखमा नेकपा एमालेका लीलाधर पौडेल विजयी भएका छन् ।

शुक्रवार सम्पन्न निर्वाचनमा प्रमुखमा पौडेलसहित सबै पदमा एमालेका उम्मेदवार विजयी भएका हुन् । पोखरा महानगरपालिका वडा नं. २२ बाट निर्वाचित पौडेलले जिससमा नेपाली कांग्रेसका दीपेन्द्र ढकाललाई पराजित गरे ।

यस्तै, उपप्रमुखमा एमालेकी सरिता कुमाल विजयी भएकी छन् । उनले माओवादी केन्द्रकी उषा थापालाई पराजित गरेकी हुन् ।

यसैगरी जिससको सदस्यहरुमा पोखरा-२१ की सीतादेवी विक, रुपाका हर्क बहादुर गुरुङ, मादीका राजु अधिकारी, अन्नपूर्णका गणेश बहादुर घर्ती र वालिका सुवेदी, माछापुच्छ्रेका लक्ष्मी दमै र शुकमाया नेपाली निर्वाचित भएका छन् ।

जिससमा निर्वाचित सबैको शपथग्रहण कार्यक्रम जिससकै सभा हलमा भोलि बिहान ८ बजे हुने मुख्य निर्वाचन अधिकृतको कार्यालयले जनाएको छ ।