मड्रिड । स्पेनिश लिग ला लिगा फुटबलमा दावेदार टिम रियल मड्रिडले विजयी सुरुवात गरेको छ । मड्रिडले रियल डर्बी रियल सोसिसाडलाई उसकै मैदानमा ३–० ले हरायो ।
रियलका लागि ग्यारेथ बेलले आकर्षक सुरुवात गर्ने क्रममा पहिलो गोल खेलको ७२ सेकेन्डमै गरेका थिए । पूर्व फ्रेन्च स्टार जिनेजिन जिदानले खेलाडी जीवनबाट प्रशिक्षकको जीवन सम्हालेको रियलले ४० औं मिनेटमा मार्को एसेन्सियोको गोलबाट अग्रतालाई दोब्बर बनायो ।
एकतर्फ प्रदर्शन गरेको रियलका लागि बेलले ९० औं मिनेटमा अर्को गोल थप्दै फराकिलो जित दिलाए । स्टार स्ट्राइकर क्रिष्टियानो रोनाल्डो बिना नै मैदानमा उत्रिएको रियलले आकर्षक खेल पस्कदै लिगमा ठोस सुरुवात गरेको हो ।
योसंगै रियलले साविक विजेता बार्सिलोनालाई उपाधिका लागि ठोस चुनौती पस्केको छ ।
लिगमा एथ्लेटिको मड्रिडले भने नवप्रवेशी एल्भेससंग १–१ को बराबरीमै चित्त बुझायो ।
