काठमाडौँ। प्रधानमन्त्री पुष्पकमल दाहालले राज्यका तीन महत्वपूर्ण निकायमा महिलाको नेतृत्व स्थापित हुनु सशस्त्र जनयुद्धको परिणाम भएको बताएका छन् ।
नेकपा(माओवादी केन्द्र)को भ्रातृ सङ्गठन अखिल नेपाल महिला सङ्घ(क्रान्तिकारी)को राष्ट्रिय एकता भेलालाई यहाँ विहिबार सम्बोधन गर्दै प्रधानमन्त्री दाहालले राज्यका पाँच महत्वपूर्ण निकायमध्ये तीन निकायमा महिलाको नेतृत्व पाउनु इतिहासकै महत्वपूर्ण उपलब्धि भएको बताउँदै भने , “अहिले देशको सर्वोच्च संवैधानिक निकायमा महिलाको बलियो उपस्थिति छ । राष्ट्रपति, प्रधानन्यायाधीश र सभामुख तीनै जना महिला हुनुहुन्छ । नेपालमा जनयुद्ध हुँदैनथ्यो भने यो सम्भव थिएन । यो नेपाली जनयुद्धको देन हो ।”
प्रधानमन्त्री दाहालले वर्तमान सरकार चैतमा स्थानीय तहको निर्वाचन गर्ने तयारीमा छ भन्दै स्थानीय तहबाटै नेतृत्व विकासमा लाग्न महिलालाई आग्रह गरे । नेपालको संविधानले स्थानीय निकायमा अनिवार्य रुपमा ४० प्रतिशत महिलाको प्रतिनिधित्व हुनुपर्ने व्यवस्था गरेकाले पनि अधिकार प्राप्तिका लागि थप सहजता भएको सुनाए ।
प्रधानमन्त्रीले महिला विभाजित हुँदा परिवर्तनको आन्दोलन र कार्यसूची कमजोर हुन पुगेको छ भन्दै एकताले त्यसमा ऊर्जा प्रदान गर्ने बताए । फरक एक प्रसङ्गमा प्रधानमन्त्रीले नयाँ सरकार गरिबका पक्षमा रहेकामा जोड दिँदै दलित र कर्णालीका बच्चाको जन्मदर्तामा प्रोत्साहन भत्ता, गरिबका लागि सरकार कार्यक्रमले सरकार उत्पीडित, उपेक्षितका पक्षमा छ भन्ने प्रमाणित भएको ठोकुवा गरे ।
कार्यक्रममा नेकपा(माओवादी केन्द्र)का स्थायी समिति सदस्य जयपुरी घर्तीले पितृसत्तात्मक सोचका कारण नेपाली महिला पछाडि पर्दै आएको, घरेलु हिंसामा पर्नुपरेको र अधिकार दिनसमेत नचाहेको भन्दै आगामी दिनमा थप सङ्घर्ष गर्नुपर्नेमा जोड दिए । नेत्री शान्ता राई, उर्मिला अर्याल, रेखा शर्मा, अमृता थापा मगर, देवी खड्का लगायतले अझै पनि राज्यका विभिन्न निकायमा महिलाको उचित प्रतिनिधित्व गराउन सङ्घर्ष नै आवश्यकता रहेको बताए । रासस
