कपिलवस्तु । तौलिहवास्थित प्राचीन तौलेश्वर महादेव मन्दिरमा  श्रावणको सोमवार सयौँ  श्रद्धालुहरूले घस्रँदै  जलार्पण गरे ।  श्रावण महिनाको प्रत्येक सोमवार श्रद्धालुहरूले घस्रँदै  जलापर्ण गर्ने गर्दछन् । 

बाणगंगाको राम घाट नदीमा स्नान गरी ४ किलोमिटरको कठिन यात्रा तय गरेर जलार्पण गरेका हुन्। प्राचीन भागीरथी राम घाट (बाणगंगा) नदीमा स्नान गरी घस्रँदै र लडीबुढी खेल्दै तालेश्वर नाथ मन्दिरमा पुग्ने गर्दछन् ।
 
जलार्पण यात्राका लागि भक्तजनहरू आइतबार राति नै भक्तजनहरू नदीमा पुग्ने गर्दछन् ।  सोमबार बिहान स्नान गरी शरीरमा जल बाँधेर ५ देखि १० घण्टाको लामो यात्रा तय गरी उनीहरूले मन्दिरमा जल विसर्जन गर्ने गर्दछन् ।  

साउन महिना शिवको विशेष महिनाका रूपमा रहेकोले शिव भक्तहरू नियमित शिवको पूजा गर्ने परम्परा रहेको छ  । सयौँको सङ्ख्यामा युवायुवती, महिलाहरू र पुरुषहरू घस्रँदै जलार्पण यात्रामा सरिक भएको मन्दिर व्यवस्थापन समितिका अध्यक्ष शिव कुमार गुप्ताले बताए। 

भागीरथी नदीमा स्नान गरी ८ घण्टा घस्रँदै तालेश्वर नाथ मन्दिरमा पुगेका कपिलवस्तु नगरपालिका वडा नम्बर ३ ठूलो बर्गदवाका जितेन्द्र महराले  पारिवारिक सुखका लागि यो पुण्य कार्य गरेको बताए। ‘३ वर्षदेखि यो कार्य गदै आएको छु, भालेनाथको आर्सीवादले सबै राम्रो भइरहेको  छ,’ उनले भने।  

राखिएको भाकल पुरा हुने विश्वास गर्दै घस्रँदै जलापर्ण गर्नेको सङ्ख्या प्रत्येक वर्ष बुद्धि भएको छ । साउनमा महिनामा पार्वतीले शिवको उपासनी गरेपछि शिवसँग विवाह भएको बताइन्छ। घस्रँदै जलार्पणले महादेव खुशी हुने तथा मनोकाङ्क्षा समेत पूरा हुने धार्मिक विश्वास रहँदै आएको छ। आइतबार राती नदी किनारमा भजन कीर्तन, नाचगान गरी उनीहरूले महादेवलाई नदीको जल सोमबार बिहान अर्पण गरेका थिए।

यस वर्ष प्राचीन तालेश्वर नाथ मन्दिरमा तिथिको हिसाबले  साउनको अन्तिम सोमबार पचास हजार बढी भक्तजनहरू सरिक भएको मन्दिर व्यवस्थापन  समितिले जनाएको छ। विगत १४ वर्षदेखि तालेश्वर महादेव मन्दिरमा जलार्पण यात्रा सुरु गरिएको थियो। जलार्पण यात्राका अगुवाइ गरेका फुलिकाका शिवदास अकेलाले आफूले बाह्र वर्ष अघिदेखि सृुरु गरेको जलार्पण यात्राले सार्थकता पाउँदै गएको बताए।  

 कपिलवस्तु नगरपालिकाका नगर प्रमुख सुदिप पौडेलले जलार्पणको लागि भारत तथा नेपालकै विभिन्न स्थान तथा जिल्लावासीको सहभागिता रहने ऐतिहासिक धार्मिक स्थलको लागि नगरपालिकाले संरक्षण र प्रवर्द्धन गर्ने बताए ।