विराटनगर । संघीय समाजवादी फोरम नेपालका अध्यक्ष उपेन्द्र यादवले संविधान संशोधन नभई गरिने कुनै पनि निर्वाचन मधेसी मोर्चालाई मान्य नहुने बताएका छन् ।
समाजवादी फोरमले विराटनगरमा आयोजना गरेको अन्र्तक्रिया तथा पार्टी प्रवेश कार्यक्रममा अध्यक्ष यादवले सरकार गठन भएको एक महिना भइसकेकाले मोर्चाको माग सम्बोधनका लागि संविधान संसोधन प्रक्रियालाई प्राथमिकता साथ अघि बढाउनुपर्ने बताए ।
उनले भने, ‘मधेश आन्दोलनमा मृत्युु भएकाहरुलाई शहीद घोषणा, आर्थिक सहायता दिने विषय सरकारले अघि बढाएको काम सकारात्मक छ । अब संविधान संशोधन प्रक्रियालाई पनि तत्काल अघि बढाउनु पर्छ ।’
यादवले संविधानमा संशोधन र मधेसी आदीवासी जनजातीको समस्या समाधान गर्नका लागि नै वर्तमान सरकार गठन भएकाले आफुले गरेको सहमतिबट पछि हट्न नहुने बताए ।
अध्यक्ष यादवले मधेसको मुद्दा सम्बोधन नभए तिहारपछी आफनो पार्टी संसक्त आन्दोलनमा जाने र विगतको सरकार जस्तै यो सरकार पनि अल्पायुमै ढल्ने जिकिर गरे ।
संविधान संशोधन प्रक्रिया अगाडी नबढ्दा मधेसका जनतामा शंका छाएको सुनाए । संविधान संशोधनको विषय राजनिति कुरा भएकाले संविधान संशोधनका सवाललाई भारतसंग जोडन नहुने यादवको भनाई छ ।
दुई तिहाई जनताले वर्तमान संविधानलाई अस्वीकार गरेकाले संविधान संसोधनको विरोध गर्ने दलहरुलाई जनताले साथ नदिने तर्क गरे । संघीयता, समावेशीकरण, निर्वाचन प्रणाली तथा राजनितिक प्रतिनिधित्वका सवालमा संविधान संसोधन हुनुपर्ने यादवको भनाई छ ।
