काठमाडौैं । नेपाल क्रिकेट संघ क्यानका अध्यक्ष चतुरबहादुर चन्दले राष्ट्रिय टिमका कप्तान सन्दीप लामिछाने बलात्कारका दोषी नभइ आरोपीमात्र भएकाले आत्तिएर अहिले गर्नुपर्ने केही पनि नभएको बताएका छन् । 

उनले भने, ‘ऊ दोषी हैन आरोपी हो । अहिले नै आत्तिएर उसलाई झिकाउनु पर्ने केही छैन । प्रहरीले अनुसन्धान गर्दै होला ।’

सन्दीप यतिबेला क्यारेवियन प्रिमियर लिग खेल्न वेष्ट इन्डिजमा रहेका छन् । उनीमाथि नाबालिगलाई जवरजस्ती करणी गरेको आरोप छ । सन्दीपले गत भदौ ५ गते करणी गरेको आरोप लगाइएको पीडितको उजुरी भदौ २१ गतेमात्र दर्ता भएको थियो । 

भदौ ६ गते सन्दीप टीमसँग केन्या गएका थिए । उनकै नेतृत्वमा नेपालले केन्यासँग पाँच टी–२० क्रिकेट श्रृंखला खेलेको थियो । जसमा नेपाल ३–२ ले विजयी भएको थियो भने सन्दीप १२ विकेट लिँदै प्लेयर अफ द सिरिज भएका थिए । 

क्यान अध्यक्ष चन्दले आफूले मिडियाबाट मात्रै सन्दीपको मुद्दा दर्ता भएको घटना थाहा पाएको बताए । आफू जिम्मेवार निकायमा भए पनि यसबारे पहिले जानकारी नदिइएको उनले बताए । 

सन्दीप क्यानको सम्पर्कमै रहेको बताउँदै उनले सन्दीप आरोपीमात्रै भएकाले अहिले नै क्यारेबियन लिग बीचमा छाडेर आउन आफूहरुले नभनेको बताए । 

प्रहरीले गर्ने अनुसन्धानमा आफूहरुको पूर्ण सहयोग रहने बताउँदै चन्दले आरोपीलाई औपचारिक जानकारी बिना नै इन्टरपोल लगाएर सन्दीपलाई झिकाउँछौं भन्ने अभिव्यक्ति प्रहरीबाट आउनु दुःखद भएको बताए । 

उनले सन्दीप सम्पर्क रहेको र वेष्ट इन्डिजमा खेलिरहेको अवस्थामा भागेको जसरी नै अभिव्यक्ति दिनु गलत भएको उनको ठम्याइ छ । उनले भने, ‘अनुसन्धानका क्रममा उनलाई बोलाउनु पर्ने भयो भने जुनसुकै बेला पनि बोलाउन सकिन्छ ।’

उनको चित्त दुखाइ भने प्रहरीले गोप्यता कायम नगरेको भन्नेमा छ । उनले भने, ‘खेलाडी हो । राष्ट्रको गहना हो । देशको प्रतिनिधित्व गरेर खेल्छ । देशको छवि नै बिग्रने गरी प्रस्तुत गरियो । छानबिन गरेर मात्र बाहिर ल्याएको भए हुने । दोषी रहेछ भने त कारबाहीको भागेदार हुनैपर्छ ।’

उनले घटनाको सत्यतथ्य पत्ता लगाउन पनि प्रहरीलाई आग्रह गरेका छन् ।