न्यूयोर्क । दुई पटकका युएस ओपन च्याम्पियन राफेल नदाल यस पटक चौथो चरणबाटै बाहिरिएका छन् । चोटबाट संघर्षरत पूर्व विश्व नम्बर एक स्पेनका खेलाडी नदाललाई फ्रान्सका लुकास पाउलीले हराएका हुन् ।
पाँच सेटको संघर्षपूर्ण खेलमा नदाल १–६, ६–२, ४–६, ६–३ र ६–७ ले पराजित भए ।
२५ औं वरियताका पाउलीको भने यो करियरको अहिलेसम्मकै ठूलो जित हो । क्वार्टरफाइनलमा पुगेका पाउलीले अब आफ्नै राष्ट्रका गेल मोन्फिल्ससँग खेल्नेछन् ।
चौथो चरणमा साईप्रसका मार्कस बग्दातिसलाई हराउँदै मोन्फिल्स अन्तिम आठमा पुगेका हुन् ।
महिलातर्फ लात्भियाकी अनास्तासिया सेभास्तोभा र डेनमार्ककी क्यारोलिन वोज्नीयाकी क्वार्टरफाइनलमा पुगेकी छिन् ।
