काठमाडौं । विश्वकप फुटबलका उपाधि दावेदार टिमहरु स्पेन र इटालीले सन् २०१८ को विश्वकप छनोटमा विजयी सुरुवात गरेका छन् ।
एउटै समूह जीमा रहेका दुवै टिमले ठोस सुरुवात गर्ने क्रममा स्पेनले लिच्टेनेस्टेनलाई ८–० को भारी अन्तरले हरायो ।
स्पेनलाई जिताउने क्रममा डिएको कोस्टा, डेभिड सिल्भा र अल्भारो मोराटाले २–२ गोल गरे । त्यस्तै सर्गी रोबर्टो र भिटोलोले १–१ गोल गरे ।
त्यस्तै इटालीले इजरेललाई ३–१ ले हरायो ।
इटालीका लागि ग्राजिआनो पेल्ले, एन्टोनियो कान्द्रेभा र सिरो इमोबिलेले १–१ गोल गरे ।
जर्जिओ चिलेनी भने दोहोरो पहेंलो कार्ड खाँदै बाहिरिएका छन् । अन्य खेलमा अष्ट्रियाले जर्जियालाई २–१ ले, वेल्सले मोल्डोभालाई ४–० ले हरायो ।
पाँच खेल भने बराबरीमा सकिएका छन् ।
क्रोएसियाले टर्कीसंग, युक्रेनले आइसल्याण्डसंग, फिनल्याण्डले कोसोभोसंग र अल्बानियाले मेसेडोनियासंग समान १–१ को बराबरी खेल्यो ।
सर्विया र आयरल्याण्डले भने २–२ को बराबरी खेलेका छन् ।
