बोरिसोभ एरिना । विश्वकप छनोट फुटबल अन्तर्गत युएफा क्षेत्रको खेलमा फ्रान्सले फितलो सुरुवात गरेको छ । फ्रान्सले बेलारुससंग उसकै मैदानमा गोलरहित बराबरी खेलेको हो ।
खेलमा ओलिभियर गिरुले प्रहार गरेको बल पोलमा ठोक्किएर फर्किएको थियो भने पल पोग्बा र एन्टोइन ग्रिजम्यानले राम्रो अवसर पाएर पनि गोल गर्न सकेनन् ।
मध्यान्तरपछि फ्रान्सका दिमित्री पायेले पाएको राम्रो अवसरसमेत खेर फालेपछि फ्रान्स बिना गोल नै खुम्चिनु पर्यो ।
समूह ए का अन्य खेलमा नेदरल्याण्डस् र स्वीडेनले १–१ को बराबरी खेल्दा बुल्गेरियाले लग्जेम्बर्गलाई ४–३ ले हरायो ।
त्यस्तै समूह एच को खेलमा ग्रीसले जिब्राल्टारलाई ४–१ ले, बेल्जियमले साइप्रसलाई ३–० ले तथा बोस्निया हर्जगोविनाले इस्टोनियालाई ५–० ले हरायो ।
