ओल्ड ट्राफोर्ड । पाकिस्तानविरुद्धको एक दिवसीय क्रिकेटमा ४–१ ले श्रृंखलामाथि कब्जा जमाएको इङल्याण्ड एकमात्र टी–२० क्रिकेटमा भने लज्जास्पद हार बेहोर्न वाध्य भएको छ । घरेलु मैदान म्यानचेष्टरको ओल्ड ट्राफोर्डमा बुधबार राति भएको खेलमा पाकिस्तान ९ विकेटले विजयी भयो ।
पहिले ब्याटिङ गरेको इङल्याण्डले ७ विकेटको क्षतिमा १३५ रन बनायो ।
एलेक्स हेल्सले सर्वाधिक ३७ रन बनाएको इङलिश इनिङमा रनको अंकुश लगाउने क्रममा वहाब रियाजले १८ रन खर्चेर ३ विकेट लिए ।
त्यस्तै इमद वासिम र हसन अलीले समान २–२ विकेट लिए ।
जवाफमा पाकिस्तानले १४.५ ओभरमै १ विकेटको क्षतिमा विजय लक्ष्य हासिल गर्यो । पहिलो विकेटका लागि १०७ रनको साझेदारी गर्ने क्रममा सर्जिल खान र खालिद लतिफले समान ५९ रन जोडे ।
यो एकमात्र टी–२० खेलको जितले भने पाकिस्तानले यसअघि टेष्ट र एक दिवसीयमा बेहोरेको हारको बदला लिएको छ ।
