एजेन्सी । इङ्गलिश प्रिमियर लिगको बहुप्रतिक्षित म्यान्चेस्टर डर्बीको बाजी म्यान्चेस्टर सिटीले मारेको छ । म्यान्चेस्टर युनाइटेडलाई भने झट्का लागेको छ । प्रिमियर लिगका दुई महारथी म्यानयु र म्यान्सिटीबीच शनिबार साँझ ओल्डट्राफोडमा भएको खेलमा सिटी २–१ को संघर्षपूर्ण जित हासिल गर्न सफल भयो ।
खेलको १५ मिनेटमै म्यान्सिटीले केभिन डे ब्रायनको गोलबाट अग्रता लियो । ३६औं मिनेटमा सिटीकै केलेची ल्हेनाचोले एक गोल थप्दै अग्रता दोब्बर पारे । यद्यपि, पहिलो हाफ अघि ४२औं मिनेटमा ज्लाटान इब्राहिमोभिचले गोल गर्दै म्यानयुको हार अन्तर कम गरे । म्यानयुका खेलाडीबाट त्यो भन्दा बढी कुनै प्रगति हुन सकेन । अन्तर कम गरेपछि आक्रामक भएको म्यानयुका चार खेलाडीले पहेंलो कार्ड पाए ।
उनीहरुले गोलका लागि थुप्रै प्रयास गरे । सफल हुन सकेनन् । हारसंगै म्यानयु प्रशिक्षक जाेजे मौरिन्हो भन्दा म्यान्सिटी प्रशिक्षक पेप ग्वार्डिओला नै अब्बल रहेको प्रमाणित भएको विश्लेषण भएको छ । यो डर्बीलाई दुबै तर्फका खेलाडी र प्रशिक्षकको परीक्षाका रुपमा लिइएको थियो ।
यो जितसंगै अपराजित रहेको म्यान्सिटी १२ अंकका साथ लिग तालिकाको शीर्ष स्थानमा यथावत छ । तीन खेल लगातार जितेको युनाइटेड पहिलो हार बेर्होदै पछि परेको छ ।
