लिबर्टी स्टेडियम । म्यानचेष्टर सिटी इङलिश प्रिमियर लिग फुटबलमा सत्प्रतिशत नतिजा निकाल्ने एकमात्र टिम बनेको छ । आइतबार राति भएको खेलमा चेल्सी स्वान्सी सिटीसंग २–२ गोलको बराबरीमै थन्किएपछि म्यानचेष्टर सिटीले स्पष्ट तीन अंकको अग्रता लिएको हो ।
स्वान्सीको मैदानमा भएको खेलमा रेफ्री आन्द्रे मारिनेरको शिकार भएको भन्दै चेल्सी खेलाडी गेरी काहिल र चेल्सी प्रशिक्षक एन्टोनियो कोन्टेले आलोचना गरेका छन् ।
दोस्रो हाफमा स्वान्सी खेलाडी लेरो फेरले गरेको फल नदिएर रेफ्रीले अन्याय गरेको उनीहरुको आरोप छ । चन्द्रमामा बसेर हेरेको भए त्यो फल देखिने पनि काहिलले बताएका छन् ।
खेलको १८ औं मिनेटमा डिएगो कोस्टाको गोलबाट चेल्सीले प्रारम्भिक अग्रता लियो ।
५९ औं मिनेटमा पाएको पेनाल्टीलाई सिगुर्डसनले गोलमा परिणत गर्दै स्वान्सीलाई १–१ को बराबरीमा ल्याए ।
त्यसको तीन मिनेटमै लेरो फेरले गोल गर्दै स्वान्सीलाई अग्रता दिलाए ।
८१ औं मिनेटमा फेरि कोस्टाले अर्को गोल थप्दै खेल बराबरीमा ल्याए ।
बराबरीसंगै चेल्सी १० अंकसहित दोस्रो स्थानमा कायमै छ ।
