पोखरा । राष्ट्रिय प्रजातन्त्र पार्टीको तर्फबाट कास्की क्षेत्र नं. २ (ख) मा उम्मेदवारी दिएका अरुण गिरीले करको नाममा राज्यले नागरिकको ढाड सेक्ने काम मात्र गर्न नहुने बताएका छन् ।

नागरिकले तिरेको करको सही सदुपयोग गर्नुको साटो सरकारमा सहभागी दलहरु सुविधाभोगी बन्न पुग्दा त्यसको दुरुपयोग हुने गरेको प्रति गिरीले चिन्ता व्यक्त गरे ।

’तीन तहको सरकार हुँदा नागरिक दोहोरो तेहेरो करको मारमा परिरहेका छन् । त्यसैमाथि कर तिर्नका लागि नागरिकलाई अझै बढि सास्ती छ ।’ गिरीले भने, ‘यातायात कार्यालयमा कर तिर्नकै लागि नागरिकले घुस खुवाउनु परेको स्थिति छ । साँच्चै यस्ता दृश्यहरुले नेपाललाई साह्रै कुरुप बनाईरहेका छन् ।’ 

गिरीले जनप्रतिनिधिहरुको सुविधाभोगी आचरणले यस्तो समस्या आईरहेको बताउँदै नागरिकको काम गर्दा सुविधा खोज्न नहुनेमा जोड दिए । उनले जनताको सेवा गर्नका लागि भन्दै राजनीति गर्नेहरुले त्यसलाई पैसा कमाउने माध्यम बनाएको कारण यस्तो समस्याले निरन्तरता पाएको बताए ।

‘राजनीति कुनै पनि हिसाबले पेशा हुन सक्दैन । र, आर्थिक लाभ लिनका लागि गरिने राजनीतिले देशको विकास गर्दैन ।’ गिरीले भने, ‘हाम्रो पार्टी राप्रपाले यही विषयलाई आफ्नो सबैभन्दा ठूलो मुद्दा बनाएर अहिले चुनावमा होमिएको छ । हामी भ्रष्टाचार गरेर खानु आमाको रगत खानु सरह मान्छौँ । त्यसैले यो देशको साँच्चिकै विकास गर्ने हो भने नागरिकले भ्रष्टाचारमा शून्य सहनशीलता राख्ने पार्टी राप्रपालाई नै मत दिएर जिताउनुपर्छ ।’ 

गिरीले राप्रपालाई जिताउँदा प्रत्येक नागरिकका लागि फाइदै-फाइदा भएकोले यो पटक मत परिवर्तन गरेर जनताले ठूला पार्टीलाई सबक सिकाउन जरुरी रहेको बताए । गिरीले आफ्नो चुनावी एजेन्डामा पनि दोहोरो कर र नागरिकलाई परेको आर्थिक भारको विषयमा सम्बोधन गरेको बताउँदै निर्वाचित भएसँगै यो विषयलाई सदनमा चर्को रुपमा उठाउने प्रतिवद्धता जनाएका छन् ।

त्यस्तै नागरिकले राज्यबाट पाउने सेवा सुविधा लिनका लागि पनि सास्ती ब्यहोर्नुपर्ने तितो यथार्थ रहेको उल्लेख गर्दै गिरीले त्यसका लागि पनि आफूले नीतिगत रुपमा काम गरि तत्काल सहजताका लागि काम गरेर देखाउने वचन दिएका छन् । 

‘सरकारी सेवा सुविधा बिना झन्झट, भनसुन र आर्थिक लेनदेन बिना नै सहज रुपमा हुने गरि व्यवस्था मिलाउन मैले संसदमार्फत भूमिका खेल्नेछु ।’ गिरीले भने,‘मोबाईल एपबाटै घरमै बसिबसि सरकारी सेवा सुविधा लिने र सो बापतको दस्तुर बुझाउने व्यवस्था मिलाउनका लागि मैले विशेषरुपमा काम गर्नेछु ।’ साथै गिरीले विज्ञ समूहरुको निर्माण गरि यस्ता विषयको तत्काल सम्बोधन गर्न फरक निकाय नै बनाउन आफूले प्रस्ताव गर्ने बताए ।

राप्रपाका उम्मेदवार गिरी यतिबेला आफ्नो क्षेत्रका विभिन्न स्थानमा चुनावी घरदैलो गरिरहेका छन् । घरदैलोको क्रममा राप्रपा र उम्मेदवार गिरीको पक्षमा ठूलो जनसमर्थन मिलेको छ । गिरीले आफू यो पटक कुनै पनि हालतमा जनताबाट निर्वाचित भएर संसदमा पुग्ने कुरामा ढुक्क रहेको जानकारी दिएका छन् ।