फ्लसिङ मिडोज् । यस वर्षको युएस ओपन टेनिस प्रतियोगिताको उपाधि स्वीस टेनिस खेलाडी स्टानिस्लास वावरिङ्काले जितेका छन् ।
अमेरिकाको न्यूयोर्कस्थित फ्लसिङ मिडोज्मा सोमबार बिहान भएको फाइनलमा विश्व नम्बर एक सर्वियन खेलाडी नोभाक जोकोभिचलाई हराउँदै वावरिङ्काले उपाधि जितेका हुन् ।
करियरको तेस्रो ग्राण्डस्लाम उपाधि जित्ने क्रममा वावरिङ्काले खेल ६–७, ६–४, ७–५ र ६–३ को सेटमा जिते ।
पहिलो सेट टाइब्रेकरमा ७–१ ले जितेका जोकोभिचले दोस्रो सेटको खेलका क्रममा खुट्टामा चोट लागेपछि भने खेलमा फर्किन सकेनन् ।
जोकोभिचले चौथो सेटमा ३–१ ले पछि परेको अवस्थामा विवादित इन्जुरी टाइम आउट लिएका थिए ।
सेप्टेम्बर ११ मा न्यूयोर्कमा ज्यान गुमाएकाको वार्षिकीको दिन भएको खेल जितेसंगै ३१ वर्षीय वावरिङ्काले उपाधि मृतकको सम्झनामा अर्पण गरेका छन् ।
वावरिङ्काले यसअघि सन् २०१४ मा अष्ट्रेलियन अोपन तथा २०१५ मा फ्रेन्च ओपनको उपाधि जितेका थिए ।
