काठमाडौं । आजको निर्वाचनको क्रममा मुलुकभर २६ जिल्लाका ४८ वटा मतदान केन्द्रमा झडप र विवाद भएको छ । झडप विवाद हुँदा मतदान कार्य प्रभावित भएको नेपाल प्रहरीले जनाएको छ ।
आइतबार बिहानैदेखि प्रतिनिधि सभा र प्रदेश सभा सदस्य निर्वाचनका लागि मतदान भइरहेकामा विभिन्न विषयमा विवाद तथा झडप हुँदा २६ जिल्लाका ४८ वटा मतदान केन्द्रमा मतदान रोकिएको थियो ।
केही स्थानमा भने सुचारु भैरहेको नेपाल प्रहरीका प्रवक्ता डीआईजी टेकप्रसाद राईले जनाएका छन् । मतदान रोकिएकामध्ये ३५ वटामा पुनः मतदान शुरु भइसकेको छ भने बाँकी ठाउँहरूमा मतदान कार्य नरोक्न छलफल चलिरहेको पनि डीआईजी राइले जानकारी दिए ।
डीआईजी राईले विवाद र झडप हुँदा स्थिति नियन्त्रण गर्न प्रहरीले १५ ठाउँमा गोली चलाएको थियो । ‘
मतदानको क्रममा विवाद भएपछि त्यहाँको अवस्था नियन्त्रणमा लिनका लागि प्रहरीले हवाई फायर गरेको थियो’, डीआईजी राइले भने । देशभर कहीँ पनि अप्रिय घटना नभएको पनि प्रहरीले जनाएको छ ।
प्रहरीका अनुसार रौतहट, मोरङ, सिराहा, चितवन, दोलखा, बाजुरा, हुम्लालगायत जिल्लाहरुमा प्रहरीले सुरक्षा व्यवस्था कडा बनाएको छ । दोलखा, बाजुरा र चितवनमा प्रहरीले स्थिति नियन्त्रणमा लिनका लागि थप सुरक्षा बल मगाएको थियो ।
