काठमाडौं । नेपाली काँग्रेसको भ्रातृ संगठन नेपाल महिला संघको तेस्रो महाधिवेशन बुधबारदेखि राजधानीको भृकुटीमण्डपमा सुरु हुँदैछ । यसका लागि २२४४ महाधिवेशन प्रतिनिधि काठमाडौं आइसकेका छन् ।
सोमबारदेखि नै पार्टी मुख्यालय सानेपामा नाम दर्ता जारी छ । सो क्रम मंगलबार पनि चलिरहेको छ ।
बुधबारको कार्यक्रम के छ त ?
बुधबार आफ्नो ठाउँमा बसेका महाधिवेशन प्रतिनिधिहरु सो ठाउँबाटै बिहान १० बजे जुलुससहित शान्ति बाटिका रत्नपार्क भेला हुनेछन् । प्रतिनिधिहरु सुन्धारा, बागबजार, ठमेल र नयाँ बजारका होटलहरुमा बसिरहेको केन्द्रीय सदस्य मालती सोडारीले बताइन् ।
शान्तिबाटिकामा भेला भएपछि त्यहाँबाट सबै एकैपटक उद्घाटन स्थल भृकुटीमण्डपमा भेला हुनेछन् ।
खानपिनको व्यवस्था भृकुटीमण्डपमै हुनेछ ।
दिउँसो १ बजे उद्घाटन कार्यक्रम सुरु हुनेछ ।
पार्टी सभापति शेरबहादुर देउवाले उद्घाटन गर्नेछन् ।
उद्घाटन कार्यक्रम तीन घण्टाको हुनेछ ।
तर नेताहरुले बोल्दा समयलाई ख्याल नगर्ने भएकाले र समयमै कार्यक्रम सुरु हुने ग्यारेन्टी नभएकाले लम्बिन पनि सक्छ ।
रातिको खाना भृकुटीमण्डपमै हुने भएकाले तीन घण्टाको तालिका भए पनि त्यो स्वतः बढ्ने निश्चित छ ।
बिहीबारको कार्यक्रम –
बिहीबार बिहान ८ बजे भृकुटीमण्डपमै चियापान कार्यक्रम हुनेछ ।
त्यसपछि भृकुटीमण्डपमै बन्दसत्र सुरु हुनेछ ।
३१ गते शुक्रबार नयाँ नेतृत्वका लागि निर्वाचन हुने कार्यक्रम भए पनि निर्वाचन समितिले अहिलेसम्म त्यो तालिका बनाउन सकेको छैन ।
