काठमाडौं । भारतको नयाँ दिल्लीबाट काठमाडौं आएको नेपाल एयरलाइन्सको राष्ट्रिय ध्वजावहाक आर ए –२०६ विमानको त्रिभुवन अन्तर्राष्ट्रिय विमानस्थलमा अवतरणको क्रममा टायर पड्किएको छ ।
विमानमा रहेका यात्रुहरुहरुलाई भने कुनै चोट नलागेको बताइएको छ । विमानमा परराष्ट्रमन्त्री प्रकाशशरण महत समेत दिल्लीबाट फर्किएका थिए । महत फर्किएकै विमानको टाय पञ्चर भएको विमानस्थलबाट उनका सहयोगी एकराज पाठकले जानकारी दिए ।
लुम्बिनी नाम भएको यो जहाजको यात्रु क्षमता १ सय ५८ सिट रहेको छ भने, सबै सिटमा यात्रु रहेको बताइएको छ ।
अवतरण गरेर पहिलो नम्बरमा रहेको अल्फा ट्याक्सी–वेबाट पार्किङ–वेमा आउँदै गरेको बेला जहाजको पछाडिको बायाँतर्फको एउटा पाङ्ग्रा काम नलाग्ने गरी ब्रस्ट भएको हो ।
जहाज धावनमार्गलाई असर पर्ने गरी रोकिएपछि उडान र अवतरणमा असर पुगेको छ । धावनमार्गमा जहाज गुड्न नमिल्ने गरी निगमको एयरबस रोकिएपछि त्रिभुवन अन्तराष्ट्रिय विमानस्थल कार्यालयले रनवे बन्द गरिदिएको छ ।
