नोउ क्याम्प । युएफा च्याम्पियन्स लिग फुटबलमा स्पेनी क्लव बार्सिलोनाले शानदार प्रदर्शन गरेको छ । घरेलु मैदान नोउ क्याम्पमा भएको खेलमा बार्सिलोनाले स्कटल्याण्डको क्लव सेल्टिकलाई ७–० को फराकिलो एवं प्रभावशाली जित हासिल ग¥यो ।
लिगमा उत्कृष्ट सुरुवात गर्ने क्रममा अर्जेन्टाइन स्ट्राइकर लिओनल मेसीले ह्याट्रिक गरे । त्यस्तै लुइस सुवारेजले दुई तथा इभा राकिटिच र एन्द्रेस इनिस्ताले एक एक गोल गरे ।
यो हारसंगै सेल्टिकले युएफामा सबैभन्दा फराकिलो हारको कीर्तिमान रचेको छ । खेलमा मौसा डेम्बेलेले प्रहार गरेको पेनाल्टीसमेत खेर फालेपछि सेल्टिक लज्जास्पद हार बेहोर्न वाध्य भएको हो ।
बार्सिलोना र सेल्टिक रहेको समूह सीको म्यानचेष्टर सिटी र बोरुसिया एम्ब्याचबीचको खेल भने खराव मौसमका कारण रद्द भएको छ ।
च्याम्पियन्स लिगमा जर्मनीको बायर्न म्युनिखले पनि शानदार जित हासिल गरेको छ । बायर्नले रुसको एफसी रोस्तोभलाई ५–० ले हरायो ।
बायर्नको समूहको अर्को खेलमा स्पेनको एथ्लेटिको मड्रिडले नेदरल्याण्डस्को पिएसभी आइन्डोभनलाई १–० ले पराजित गरेको छ ।
च्याम्पियन्स लिग अन्तर्गतका अन्य खेलमा फ्रान्सको पेरिस सेन्ट जर्मेन पिएसजी र इङ्ल्यान्डको आर्सनलले १–१ गोलको बराबरी खेलेका छन् ।
त्यस्तै स्वीट्जरल्याण्डको एफसी बाजलले बुल्गेरियाको लुदोगोरेट्स राजगार्डसँग पनि १–१ गोलको बराबरी खेलेको छ ।
यस्तै ईटालीको नापोलीले युक्रेनको डाईनामो किभलाई २–१ ले हरायो । तर पोर्चुगलको बेनिफिका र टर्कीको बेसिक्तासले भने १–१ गोलको बराबरी खेलेका छन् ।
