सन् २०२२ को विश्वकप फुटबल कतारमा भइरहेको छ । कतार विश्वकपका खेलहरु आठ वटा मैदानमा खेलिएको छ । आठै वटा मैदानका आ–आफ्ना विशेषता रहेका छन् । यी रंगशालाको बनावटले कतारको भौगोलिक, सांस्कृतिक र ऐतिहासिक महत्व बोकेका छन् । कतारले सन् २००६ देखि नै विश्वकप आयोजनाका लागि रंगशाला तयार गर्न थालेको थियो । 
पहिलो पटक खाडी मुलुकमा भइरहेको विश्वकपलाई निकै महत्वका साथ हेरेको कतारले रंगशाला निर्माणमा कुनै कसर बाँकी राखेको छैन । अल बेट स्टेडियमबाट शुरुआत भएको विश्वकपका खेलहरु लुसेल स्टेडियममा पुगेर टुङ्गिने छन् ।

यस्ता छन् रंगशालाहरु–

अल बेट स्टेडियम 
यो रंगशालाको नाम ‘बेट अल शा आर’ बाट लिइएको हो । वास्तवमा यी पालहरु थिए जुन ऐतिहासिक रुपमा कतार र खाडी क्षेत्रमा घुमन्ते मानिसहरुले प्रयोग गर्दथे । यो रंगशालाको डिजाइनले कतारको विगत र वर्तमानलाई सम्मान गर्दछ । यो रंगशाला धेरै ठूलो छ । यो रंगशालाको उद्घाटन सन् २०२१ को नोभेम्बर ३० मा फिफा अरब कपका क्रममा भएको थियो । 

६० हजार दर्शक क्षमताको यो रंगशालालाई विश्वकपपछि पुनःनिर्माण गरेर पाँच तारे होटल, शपिङ सेन्टरसँगै खेल चिकित्सा अस्पताल लगायतका थुप्रै सुविधाहरु रहने छन् । जीएसएएसबाट पाँच तारा रेटिङ पाएको यो रंगशालामा विश्वकपको उद्घाटन खेल हुनेछ । त्यसैगरी एक सेमिफाइनल खेलसहित नौ खेल यो रंगशालामा खेलाइने छ ।  

स्टेडियम ९७४
दोहा स्काइलाइनको शानदार दृष्यका साथमा एकमात्र पानी अगाडिको स्थलका रुपमा स्टेडियम ९७४ रहेको छ । बन्दरगाह र औद्योगिक इतिहास प्रतिध्वनित हुने यो रंगशाला मानक प्रमाणित ढुवानी कन्टेनरहरु र मोड्युलर स्टिलको प्रयोग गरेर निर्माण गरिएको छ । जसका कारण यो रंगशाला एक विशिष्ट, आधुनिक र रंगीन क्षेत्र बन्न पुगेको छ । यो रंगशालाको अवधारणा फेनविक इरिबरेन आर्किटेक्ट्सले डिजाइन गरेको हो । 
जसअनुसार पारम्परिक रंगशालाको तुलनामा कम निर्माण सामग्री खर्च भएको छ । त्यतिमात्र हैन यो रंगशाला उद्धेश्य पूरा भएपछि पूर्णरुपमा भत्काएर अन्य योजनाका लागि प्रयोग गर्न सकिन्छ । यसका सामग्रीहरु पुनः प्रयोग गर्न सकिन्छ । यो रंगशालाले यसको डिजाइन र निर्माण दुवैका लागि विश्वब्यापी स्थिरता मूल्याङ्कन प्रणाली (जीएसएएस) बाट पाँच तारा रेटिङ पाएको छ । 

सन् २०२१ को नोभेम्बर ३० मा संयुक्त अरब इमिरेट्स र सिरियाबीच भएको अरब कपको खेलबाटै औपचारिक रुपमा यो रंगशालाको उद्घाटन भएको थियो । यो रंगशालालाई पहिले रास अबु अबुड स्टेडियमका नामले चिनिन्थ्यो । अहिले यसको नाम ९७४ रंगशाला भनेर कतारको अन्तर्राष्ट्रिय फोन कोडबाट राखिएको हो । रंगशालाको डिजाइनमा ९७४ ढुवानी कन्टेनरको प्रयोग भएको थियो । 

यो मैदानमा सात खेल खेलिने छन् । छ खेल समूह चरणका र एक खेल राउण्ड अफ सिक्सटिनको हुनेछ । 

अल थुमामा स्टेडियम
यो रंगशाला कतारको दोहामा रहेको छ । यो रंगशालाको डिजाइन लोभलाग्दो छ । यसको डिजाइनले गहफियालाई प्रतिनिधित्व गर्दछ । गहफिया अर्थात् मध्य पूर्वका पुरुषले लगाउने परम्परागत बुनेको टोपीको आकारमा । यसले यो क्षेत्रको परम्परागत पोशाकको आधारभूत तह झल्काउँछ । यसलाई स्वाधीनता र स्वाभिमानको प्रतीकका रुपमा पनि लिइन्छ । 

४० हजार दर्शकको क्षमता भएको यो रंगशालाको उद्घाटन सन् २०२१ को अक्टोबर २२ मा भएको थियो । यो रंगशालामा विश्वकपका आठ खेल खेलिने छन् । जसमा छ खेल समूह चरणका, एउटा राउन्ड अफ १६ को र एउटा खेल क्वार्टरफाइनलको हुनेछ । 

खलिफा इन्टरनेशनल स्टेडियम
यो रंगशाला नयाँ चिस्याउने प्रणाली राखेर बनाइएको हो । कतारमा बढी गर्मी हुने भएसँगै यो रंगशालालाई निकै नै सन्तुलित मौसममा बनाउन चिस्याउने प्रणालीको प्रयोग गरिएको हो । विश्वकपका लागि यो रंगशालामा ब्यापक पुनः निर्माण गरियो । जसका कारण १० हजार ४५० सिट थपेर रंगशालाको दर्शक क्षमता ४० हजार पुगेको छ । यो रंगशालामा नयाँ एलईडी प्रकाश प्रणाली राखेर नयाँ आयाम थपिएको छ । यो रंगशाला सन् १९७६ मा बनाइएको थियो । 

यो रंगशालामा विश्वकपका आठ खेल खेलिने छन् । समूह चरणका ६, राउन्ड अफ सिक्सटिनको १ र तेस्रो स्थानका लागि प्लेअफ खेलिने छ । 

अहमद बिन अली स्टेडियम
यो रंगशालाले कतारको समग्र प्रतिनिधित्व गरेको छ । यसको विशेषता भनेकै देशका विभिन्न पक्षहरुलाई चित्रण गर्नु हो । यसको ढाँचाले परिवारको महत्व, मरुभूमिको सौन्दर्य, लोरा र जीवजन्तुका साथै स्थानीय र अन्तर्राष्ट्रिय ब्यापारलाई प्रतिनिधित्व गरेको छ । सन् २०१६ मा खोलिएको रंगशालाको छेउँमा मल अफ कतारका अतिरिक्त पार्क, क्याफे र पैदल मार्गहरु रहेका छन् । 

रंगशालाको उद्घाटन सन् २०२० को डिसेम्बरको अमिर कप फाइनल खेलबाट भएको थियो । ४० हजार दर्शक क्षमता भएको यो रंगशालामा विश्वकपका सात खेल खेलिने छन् । छ खेल समूह चरणका र एक खेल राउन्ड अफ सिक्सटिनको हुनेछ । 

अल जानोब स्टेडियम
यो रंगशाला अल वक्राहको समुद्री यात्राको विगतलाई श्रद्धाञ्जली दिन पारम्परिक ढो डुंगाको पालबाट डिजाइन गरिएको हो । यसको शीतल प्रणाली र हटाउन सकिने छतका कारण रंगशाला वर्षैभर प्रयोग गर्न सकिने खालको छ ।

यो रंगशाला एइकम र जहा हादिद आर्किटेक्टबाट डिजाइन गरिएको हो । ४० हजार दर्शक क्षमताको यो रंगशालाको उद्घाटन सन् २०१९ को मेमा गरिएको थियो । 

विश्वकपमा यो रंगशालामा छ समूह चरणका खेल र एउटा राउन्ड अफ सिक्सटिनको खेल हुनेछ । 

एजुकेशन सिटी स्टेडियम
यो रंगशाला थप विशेष रहेको छ । रंगशालाको मुहारमा त्रिकोणहरु रहेका छन् । जसले हीरा जस्तो ज्यामितीय ढाँचाहरु बनाउँछ । यसले आकाशमा सूर्यको गतिसँगै रंग परिवर्तन भएकोसमेत देखिने छ ।

हीराजस्तै रंगशालाको डिजाइनले गुणस्तर, स्थायित्व र लचिलोपनको प्रतिनिधित्व गरेको छ । यसकै कारण यो रंगशाला कतारको विगतको सम्झना र भविष्यका लागि बहुमूल्य संरचनासमेत बनेको छ । 

४० हजार दर्शक क्षमताको यो रंगशाला सन् २०२० को जुनमा उद्घाटन गरिएको थियो । विश्वकपमा यो रंगशालामा समूह चरणका छसहित आठ खेल खेलिने छन् । डिसेम्बर ६ (मंसिर २० गते) क्वार्टरफाइनल खेल हुनेछ । 

लुसेल स्टेडियम
लुसेल रंगशाला यो विश्वकपको सबैभन्दा महत्वपूर्ण रंगशाला हो । किनकि कतार विश्वकपको फाइनल खेल यही रंगशालामा खेलिँदैछ । यो रंगशालाको डिजाइन प्रकाश र छायाँको अन्तरक्रियाबाट प्रेरित रहेको छ ।

यसले फनार लालटेनलाई चित्रण गर्दछ । यो रंगशालाको आकार र अग्रभागले कचौरा र अन्य भाँडाकुँडाहरुमा जटिल सजावटी आकृतिहरु प्रतिध्वनित गरेको छ ।

यसलाई अरब र इस्लामिक दुनियाँमा कला र शिल्प कौशलको स्वर्णयुगको विशेषताका रुपमा पनि चित्रित गरिएको छ । 

विश्वकप सकिएपछि यो रंगशालामा सुविधाजनक आवास एकाइहरु, पसलहरु, चमेनागृह, स्वास्थ्य क्लिनिक, विद्यालय लगायत हुन सक्ने बताइएको छ । यो रंगशाला निर्माणमा दिगो भवन अभ्यासको प्रयोग गरिएको छ । रिसाइकल गरिएको पानी रंगशाला वरपरका बिरुवाहरुलाई सिचाइँ गर्न प्रयोग गरिने छ । 

यहाँ प्रयोग भएको पोलिटेट्राफ्लुरोइथाइलिन नामक अत्याधुनिक सामग्रीले रंगशालालाई तातो हावा र धुलोबाट जोगाउँछ । रंगशालाको वातानुकुलितमा बोझ कम गर्न यसले छायाँसमेत प्रदान गर्नेछ र पर्याप्त प्रकाश दिनेछ । यो रंगशालाले जीएसएएसबाट पाँच तारा रेटिङ पाएको छ । 
कतारको सबैभन्दा ठूलो यो रंगशालामा ८० हजार दर्शक अट्ने क्षमता रहेको छ । यो रंगशालामा विश्वकपका १० खेल खेलिने छन् । समूह चरणका ६ खेलका साथै बाँकी हरेक चरणका एक एक खेल खेलिने छन् । 

डिसेम्बर ५ (मंसिर १९ गते) राउन्ड अफ सिक्सटिनको खेल हुनेछ । डिसेम्बर ९ (मंसिर २३ गते) क्वार्टरफाइनल खेल हुनेछ । डिसेम्बर १३ (मंसिर २७ गते) सेमिफाइनल हुनेछ । यो विश्वकपको सबैभन्दा महत्वपूर्ण दिन अर्थात् फाइनल खेल १८ डिसेम्बर (पुस ३ गते) हुनेछ ।