लण्डन । इङल्याण्डको प्रिमियर लिग क्लव लेष्टर सिटीले च्याम्पियन्स लिग फुटबल प्रतियोगिताको डेब्यु खेलमा उत्कृष्ट सुरुवात गरेको छ ।
प्रिमियर लिगको साविक विजेता भएको नाताले च्याम्पियन्स लिगमा पहिलो पटक सहभागीता जनाएको लेष्टरले बेल्जियमको क्लव ब्रुजलाई उसकै मैदानमा ३–० ले हरायो ।
लेष्टर सिटीका रियाद माहारेजले दुई तथा मार्क अल्ब्राइटनले एक गोल गरे ।
जितसँगै लेष्टर सिटीले समूह जी मा अग्रतासमेत लिएको छ । यही समूहको अर्को खेलमा पोर्चुगलको एफसी पोर्टोलाई डेनमार्कको एफसी कोपनहेगनले १–१ गोलको बराबरीमा रोकेको छ ।
यसैगरी समूह ई को खेलमा फ्रान्सको एएस मोनाकोले इङल्याण्डको टोटनह्याम हट्सपरलाई २–१ ले हरायो । त्यस्तै जर्मनीको बायर लिभरकुजेन र रुसको सीएसकेए मस्कोले २–२ गोलको बराबरी खेलेका छन् ।
यसैगरी समूह एच को खेलमा फ्रान्सको लियोंले क्रोएसियाको डाइनामो जाग्रेबलाई ३–० ले हरायो । ईटालीको युभेन्टस र स्पेनको सेभियाले गोलरहित बराबरी खेलेका छन् ।
