एजेन्सी । इङ्गलिश प्रिमियर लिगमा म्यान्चेस्टर युनाइटेडलाई फेरी अर्को झट्का लागेको छ । आइतबार साँझ वाट्फोर्डको मैदानमा भएको खेलमा ३–१ को हार व्यहोरेको म्यानयुलाई लगातार दोस्रो झट्का लागेको हो ।
यसअघि घरेलु मैदानमा भएको खेलमा म्यानयु म्यान्चेस्टर सिटीसंग पराजित भएको थियो । ३४औं मिनेटमा एटिएन कोपाउएको गोलबाट सुरुवाती अग्रता लिएको वाट्फोर्डले दोस्रो हाफपछि दुई गोल गरेको हो । पहिलो हाफमा १–० ले पछि परेको म्यानयुले दोस्रो हाफमा एक गोल फर्कायो । म्यानयुका लागि मार्कोस रास्फोर्डले गोल गरेका हुन् ।
पछि ८४औं मिनेटमा वाट्फोर्डका हुँवा क्यामिलो जुनिगाले गोल गर्दै खेल २–१ को नतिजामा ल्याए । खेलको अन्तिम समय अर्थात् ९०औं मिनेटमा ट्रोय डिनीले पाएको पेनाल्टी सदुपयोग गर्दै गोल गर्दै ३–१ को जित सुनिश्चित गरे ।
यो हारले म्यानयुलाई लिगको अंक तालिकाको छैटौं स्थानमा धकेलिदिएको छ । सिजनका सुरुवाती ३ खेल जितेको म्यानयुको ९ अंक छ । जित संगै वाट्फोर्डले गत सिजनको लिग विजेता लेस्टर सिटीलाई पछि पारेको छ ।
लेस्टर, वेष्ट ब्रोमविच, हल सिटी र वाट्फोर्डको समान ७ अंक भएपनि गोल अन्तरका आधारमा वाट्फोर्डले यि सबैलाई पछि पारेको छ । आइतबार राति थप तीन खेल हुने भएकाले अंक तालिकामा केही फेरबदल हुन सक्ने छ । यद्यपि, म्यान्चेस्टर सिटी भने शतप्रतिशत नतिजा निकाल्दै लिगको शीर्ष स्थानमा कायम छ ।
