काठमाडौं । इङलिश प्रिमियर लिग क्लव चेल्सी इङलिश लिग कप फुटबल प्रतियोगिताको चौथो चरणमा प्रवेश गरेको छ । प्रिमियर लिगको साविक विजेता लेस्टर सिटीमाथि अप्रत्याशित परिणाम निकाल्दै चेल्सीले चौथो चरणमा ठाउँ बनाएको हो ।
२–० ले पछि परेको चेल्सीले निर्धारित ९० मिनेटसम्म २–२ को बराबरी खेल्यो ।
त्यसपछि थपिएको ३० मिनेटको खेलको दोस्रो र चौथो मिनेटमा सेस फेब्रिगासले आकर्षक दुई गोल गरेसंगै चेल्सीले शानदार जित निकालेको हो ।
यसअघि खेलको १७ र ३४ औं मिनेटमा सिन्जी ओकाजाकीले गोल गर्दै लेस्टरलाई अग्रता दिलाए । चेल्सीलाई ४५ औं मिनेटमा ग्यारी काहिल र ५० औं मिनेटमा सेजारले गोल गर्दै बराबरीमा ल्याए ।
८९ औं मिनेटमा मार्सिनले रातो कार्ड खाएपछि लेस्टरलाई झड्का लाग्यो ।
लिग कप अन्तर्गत अन्य खेलमा आर्सनलले नटिङ्घम फरेष्टलाई ४–० ले हरायो । आर्सनलका लागि लुकास पेरेजले २ गोल गरे ।
त्यस्तै लिभरपुलले डर्बी काउण्टीलाई ३–० ले हरायो । त्यस्तै नर्विच सिटीले एभर्टनलाई २–० ले, प्रेस्टनले बर्नमाउथलाई ३–२ ले, लिड्स युनाईटेडले ब्ल्याकबर्न रोभर्सलाई १–० ले, रिडिङले ब्राइटनलाई २–१ ले र न्यूकासले वोल्भरह्याम्पटनलाई २–० ले हराएर चौथो चरणमा पुगेका छन् ।
