स्पेन । स्पेनिश लिग ला लिगा फुटबलमा शीर्ष स्थानको रियल मड्रिड नवप्रवेशी टिम लस पल्मससंग २–२ गोलको बराबरीमै थन्किएको छ ।
लिगको छैटौं खेलमा लस पल्मससंग उसकै मैदानमा बराबरीमै चित्त बुझाउनु पर्दा क्रिष्टियानो रोनाल्डो र प्रशिक्षक जिनेदिन जिदान निराश बनेका छन् ।
खेलमा दुई पटक अग्रता बनाए पनि रियलले जित हासिल गर्न सकेन । पहिलो पटक रोनाल्डो ट्याक्टिकल नीति अन्तर्गत खेल सकिनु १८ मिनेट अगाडि मैदानबाट बाहिरिंदा टिमले जित हासिल गर्न सकेन ।
खेलको ३३ औं मिनेटमा मार्को एसेन्सियोको गोलबाट अग्रता लिएको रियलले ५ मिनेटमै तानाले गोल गर्दा बराबरीमा चित्त बुझायो ।
६७ औं मिनेटमा करिम बेन्जेमाले गोल गर्दै रियलले फेरि अग्रता बनायो ।
तर ८५ औं मिनेटमा सर्जियो आराउजोले गोल गरी लस पल्मसलाई शानदार बराबरी गराए ।
यो हारले भने रियल मड्रिडले डिफेन्डिङ च्याम्पियन बार्सिलोनाभन्दा मात्र एक अंकको अग्रता बनाएको छ ।
रियलको ६ खेलबाट १४ अंक हुँदा बार्सिलोनाको १३ अंक भएको छ ।
बार्सिलोनाले शनिबार रातिको आफ्नो खेलमा स्पोर्टिङ गियोनलाई ५–० को फराकिलो अन्तरले हरायो । लोराले दोहोरो पहेंलो कार्ड खाँदै बाहिरिएपछि ७४ मिनेटपछि १० जना सीमित स्पोर्टिङलाई हराउने क्रममा नेमारले दुई गोल गरे ।
त्यस्तै लुइस सुवारेज, राफिन्हा र आर्दा तुरानले एक एक गोल गरे ।
लिगको अर्को खेलमा एथ्लेटिक बिलबाओले सेभिल्लालाई ३–१ ले हराएको छ । बिलबाओ १२ अंकसहित तेस्रो स्थानमा चढेको छ ।
