काठमाडौं । नेपाली राष्ट्रिय क्रिकेट टोलीका उपकप्तान समेत रहेका ज्ञानेन्द्र मल्ल र राजेश पुलामीको अर्धसतकीय योगदानले कलर्स एक्स फ्याक्टर्सले सगरमाथा लिजेण्ड्सविरुद्ध ९ रनको सनसनीपूर्ण जित निकालेको छ ।
एभरेष्ट प्रिमियर लिग ईपीएल अन्तर्गत त्रिवि त्रिकेट मैदान कीर्तिपुरमा मंगलवार भएको दोस्रो खेलमा मल्लले ५२ र पुलामीले ५६ रनको योगदान गरेपछि कलर्सले सगरमाथासामु जितका लागि १ सय ६९ रनको चुनौती पेश गरेकामा उसले १ सय ५९ रन मात्रै बनाउन सक्यो ।
कलर्सका लागि फजलुर रहमानले २१ रन जोडे । सगरमाथाका लागि मेहबुव अलाम र विक्रम सोवले समान दुई–दुई विकेट हात पारे । अन्तिम ओभरसम्म पनि जितका लागि संघर्षरत सगरमाथाका लागि टोलीको कप्तानी सम्हालेका विनोद भण्डारीले सर्वाधिक ४८ रनको योगदान गरे ।
यस्तै, सुनील धमलाले ४६, मेहबुव अलामले २३ र अनिल मण्डलले १४ रन जोडे । कलर्सका लागि अविनाश कर्णले २ विकेट लिँदा अमर रौतेला र योगेन्द्र सिंह कार्कीले पनि समान एक–एक विकेट हात पारे ।
