काठमाडौं । च्याम्पियन्स लिग फुटबलमा उपाधि दावेदार क्लवहरु बार्सिलोना र आर्सनल विजयी हुँदा म्यानचेष्टर सिटी भने बराबरीमै थन्किएको छ ।
समुह सी को खेलमा स्पेनको क्लव बार्सिलोनाले जर्मनीको क्लव बोरुसिया एम्ब्याचलाई २–१ ले हरायो । खेलको ३४ औं मिनेटमा घरेलु मैदानमा खेलेको बोरुसियाका लागि पूर्व चेल्सी मिडफिल्डर थोर्गान हाजार्डले गोल गर्दै प्रारम्भिक अग्रता दिलाए ।
६५ औं मिनेटमा अतिरिक्त खेलाडी आर्दा तुरानले गोल गर्दै बार्सिलोनालाई बराबरीमा ल्याए ।
त्यस्तै ७४ औं मिनेटमा जेरार्ड पिकेले गोल गर्दै बार्सिलोनालाई जिताए ।
खेलका क्रममा बार्सिलोनाका हेभियर मास्चेरानो, पिके र नेमारले पहेंलो कार्ड खाएका थिए ।
यही समुहको अर्को खेलमा भने इङल्याण्डको क्लव म्यानचेस्टर सिटीलाई स्कटल्याण्डको क्लव सेल्टिकले ३–३ गोलको बराबरीमा रोकेको छ ।
समुह ए को खेलमा इङल्याण्डको आर्सनलले भने विजय हासिल गरेको छ । आर्सनलले स्वीजरल्याण्डको एफसी बाजललाई २–१ ले हरायो ।
यही समुहको अर्को खेलमा फ्रान्सको क्लव पेरिस सेन्ट जर्मेनले बुल्गेरियाको क्लव लुदोगोरेट्स राज्गार्डलाई ३–१ ले हरायो ।
समूह बी का खेलमा टर्कीको बेसिक्तास र युक्रेनको डाइनामो किभले १–१ गोलको बराबरी खेले । त्यस्तै ईटालीको नापोलीले पोर्चुगलको बेनेफिकालाई ४–२ ले हरायो ।
समुह डी का खेलहरुमा स्पेनको एथ्लेटिको मड्रिडले जर्मनीको बायर्न म्युनिखलाई १–० ले हराउँदा रुसको एफसी रोस्तोभ र नेदरल्याण्ड्सको पिएसभी आइन्डोभनले २–२ गोलको बराबरी खेलेका छन् ।
