एजेन्सी । घरेलु मैदान ओल्ड ट्राफोडको फाइदा उठाउन नसक्दा म्यानचेस्टर युनाइटेड म्यानयुले स्टोक सिटीसँग बराबरीमा चित्त बुझाउनु परेको छ ।
इङ्गलिश प्रिमियर लिगको आइतबार बेलुकी भएको खेलमा म्यानयुले अंक तालिकाको पुछारमा रहेको स्टोक सिटीसँग १–१ गोलको बराबरी खेलेको हो । खेलमा सुरुवाती अग्रता म्यानयुले लियो ।
युनाइटेडका लागि खेलको ६९औं मिनेटमा एन्थोनी मार्सेलले गोल गर्दै टोलीलाई अग्रता दिलाए । यद्यपि, युनाइटेडले आफ्नो अग्रतालाई धेरै बेर टिकाउन सकेन ।
खेलको ८२औं मिनेटमा स्टोकका लागि जो एलनले गोल गर्दे टोलीलाई खेलमा फर्काए । युनाइटेडले गोल गर्ने थुप्रै अवसर पाएपनि सदुपयोग गर्न नसक्दा खेल बराबरीमा टुंगियो ।
खेलको ८९औं मिनेटमा पाउल पोग्वाले गरेको हेड बल क्रस बारमा ठोक्किएपछि युनाइटेडले गोल गर्ने दुर्लभ अवसर गुमायो । बराबरीपछि युनाइटेड अंक तालिकाको छैठौं स्थानमा छ भने स्टोकसिटी भने पुछारबार दोस्रो स्थानमा छ ।
