एजेन्सी । इङ्गलिश प्रिमियर लिगको नयाँ सिजनमा अग्रता लिएको म्यान्चेस्टर सिटीको अपराजित यात्रा भङ्ग भएको छ । टोटनह्याम हट्स्परको घरेलु मैदान ह्वाइट हर्टमा आइतबार साँझ भएको खेलमा म्यान्सिटी २–०ले पराजित भएको हो ।
खेलको ९औं मिनेटमै म्यान्सिटीका अलेक्सान्दर कोलारोभले आत्मघाति गोल उपहार दिएपछि टोटनह्यामले अग्रता लियो । सोही हौसलाले टोटनह्याम घरेलु मैदानमा सम्हालियो ।
प्रतिस्पर्धात्मक खेलको पहिलो हाफ अघि ३७औं मिनेटमा डेल अलीले एक गोल गर्दै अग्रता दोब्बर पारे । टोटनह्यामले अग्रता दोब्बर पारेपछि आक्रामक बनेको म्यान्सिटीले थुप्रै अवसर खेर फाल्यो । पछि दुवै टोलीबाट गोल हुन सकेन ।
६५औं मिनेटमा इरिक लामेलाले गरेको पेनाल्टी खेर गयो । लिगको छैटौं चरण सम्म शतप्रतिशत नतिजा निकालेको म्यान्सिटीलाई यो हारले ठूलो घाटा लागेको छ ।
यो हारले हाल सम्म अपराजित रहेको टोटनह्यामलाई फाइदा पुगेको छ । यो जितसंगै टोटनह्यामले शीर्ष स्थानको म्यान्सिटीसंगको अंक दुरीमा मात्र एक अंक अन्तर राखेको छ । गोल अन्तरका आधारले भने म्यान्सिटीनै अघि छ ।
टोटनह्यामले हाल सम्म खेलेका ७ खेलमा पाँचमा जित र २ बराबरी गरेको छ । अपराजित उसको १७ अंक हुँदा समान खेलमा एक खेल मात्र गुमाएको म्यान्सिटीको १८ अंक छ । तेस्रो स्थानमा रहेको लिभरपुलको १६ अंक छ ।
