एजेन्सी । सन् २०१८ मा रुसमा हुने विश्वकप फुटबलका लागि दोस्रो चरणका छनोट अन्तर्गत महत्वपूर्ण खेलहरु विहिबार राति हुँदैछन् ।
युरोपेली समूह ‘जी’ अन्तर्गतको चर्चित खेलमा ईटालीले स्पेनको सामना गर्नेछ । ईटालीको टुरीनमा हुने खेल राति साँढे १२ बजे सुरु हुनेछ ।ईटालीले समुहको पहिलो खेलमा ईजरेललाई ३–१ ले हराएको थियो भने स्पेनले लिचेस्टेनलाई ८–० ले पराजित गरेको थियो ।
युरोपेली छनोटअन्तर्गत समूह ‘डी’ को खेलमा राति अष्ट्रियाले वेल्ससँग खेल्दा आयरल्याण्ड र जर्जिया तथा माल्दोभा र सर्बिया भिड्नेछन् । यस्तै, अन्य खेलहरुमा आईसल्याण्ड र फिनल्याण्ड, टर्की र युक्रेन तथा कोसोभो र क्रोएसिया भिड्नेछन् ।
विश्वकप फुटबल छनोट चरणअन्तर्गत एसिया र दक्षिण अमेरिकाका विभिन्न खेल पनि राति हुनेछन् । दक्षिण अमेरिकी छनोट अन्तर्गत इक्वेडर र चीली, उरुग्वे र भेनेजुएला, पाराग्वे र कोलम्विया, ब्राजिल र बोलिभिया तथा पेरु र अर्जेन्टिना आमने सामने हुँदै छन् ।
