वोङनाइ । हङकङमा जारी विश्वकप छनोट एसियाली क्षेत्रको महिला क्रिकेट छनोटको दोस्रो चरणको दोस्रो खेलमा नेपालले थाइल्याण्डसंग खेलिरहेको छ ।
नेपालले विजयका लागि थाइल्याण्डलाई १०९ रनको चुनौती दिएको छ ।
जारी प्रतियोगितामा व्यक्तिगत पहिलो पटक सर्वाधिक रन जोड्ने क्रममा नेपालले सुधारोन्मुख ब्याटिङ गरेको छ । नेपालले ४ विकेटको क्षतिमा १०८ रन बनायो ।
नेपाली खेलाडीहरु धेरैजसो ब्याटिङमा चम्किएका छन् । पूर्व कप्तान नेरी थापाले २५ बलमा अविजित रहँदै ३२ रन जोडेकी छिन् ।
त्यसैगरी इन्दु बर्माले ३६ बलमा २६, निर्मला कुमारी शाहीले २० बलमा २०, ज्योति पाण्डेले २६ बलमा १३ तथा कप्तान रुबिना क्षेत्रीले ६ बलमा अविजित रहँदै इनिङको एकमात्र छक्काको मद्धतले १० रन जोडिन् ।
रोशनी बोहरालेमात्र बिसर्नलायक खेल्दै ८ बलमा २ रन बनाइन् ।
अर्को चरणको प्रवेश सम्भावनालाई कायमै राख्न नेपाललाई यो खेल जित्नैपर्ने दबाब छ ।
तर नेपालले देखाएको प्रदर्शनले भने थाइल्याण्ड आत्तिएको छ । बिहीबार चीनसंग पराजित थाइल्याण्डको मनोवल पनि गिरेको देखिएको छ ।
यसअघि भएका चार खेलमा नेपालले दुईमा जित र दुईमा हार बेहोरेको थियो ।
नेपालले पहिलो चरणमा थाइल्याण्डसंग पराजय बेहोरेको थियो ।
तर बिहीबारको खेलमा आयोजक हङकङलाई हराएपछि नेपालको मनोवल बढेको छ ।
