विराटनगर । कोशी प्रदेशमा सरकार निर्माणका लागि गठबन्धनले दाबी पेश गरेको छ । नेपाली कांग्रेस संसदीय दलका नेता उद्धव थापाले दोस्रो पटक दावेदारी पेश गरेका हुन् ।
यसअघि असार २१ गतेको दाबेदारीमा सभामुख बाबुराम गौतमको समेत हस्ताक्षरबाट मुख्यमन्त्री बनेका थापालाई सर्वोच्च अदालतले रोकेको थियो । तर एक हप्तापछि फेरि उनले दाबेदारी पेश गरेका छन् ।
नेपाली कांग्रेसका २९, माओवादी केन्द्रका १३, नेकपा एकीकृत समाजवादीका चार र जसपाकी एक सांसदको समर्थनमा थापाले मुख्यमन्त्रीमा दाबी पेस गरेका हुन् ।
सभामुख गौतमले आजै राजीनामा दिएर गठबन्धनलाई समर्थन गरेसँगै थापालाई सरकार बनाउने बाटो खुलेको हो । थापाको पक्षमा ९३ मध्ये ४७ सांसदको समर्थन छ । यद्यपि दाबी पत्रमा सांसदहरूको संख्यामात्र उल्लेख छ । संसदीय दलका नेताहरूले मात्रै हस्ताक्षर गरेका छन् ।
कांग्रेसका थापा, माओवादीका इन्द्रबहादुर आङ्बोहाङ, एकीकृत समाजवादीका राजेन्द्र राई र जसपाकी निर्मला लिम्बूले हस्ताक्षर गरेका हुन् ।
एमालेका ४० तथा राप्रपाका ६ सांसद रहेका छन् ।
आजै सभामुख बाबुराम गौतमले बहुमत संख्या पुर्याउन राजीनामा दिएका थिए ।
प्रदेश प्रमुख परशुराम खापुङले सरकारको दावेदारीका लागि साँझ ५ बजेसम्मको समय दिएका थिए । सो समयअघि नै थापाले दावेदारी पेश गरेका हुन् ।
