मेस्टाल्ला । तनावपूर्ण खेलमा भ्यालेन्सियालाई पराजित गर्दै बार्सिलोना स्पेनिश लिग ला लिगा फुटबलको शीर्ष स्थानमा पुगेको छ ।
भ्यालेन्सियाको मैदानमा शनिबार राति भएको तनावपूर्ण खेलमा बार्सिलोना ३–२ ले विजयी भयो ।
२२ औं मिनेटमा बार्सिलोना स्टार लिओनेल मेसीले गरेको गोल विवादित बन्यो । लुइस सुवारेज अफसाइड बसेको देखिएको थियो ।
५२ औं मिनेटमा मुनिर ए हदादीले र ५६ औं मिनेटमा रोड्रिगोले गोल गर्दै भ्यालेन्सियालाई २–१ को अग्रता दिलाए ।
६२ औं मिनेटमा सुवारेजले गोल गर्दै २–२ को बराबरी गरे ।
तर अन्तिम मिनेटमा पाएको पेनाल्टीलाई गोलमा परिणत गर्दै मेसीले बार्सिलोनालाई ३–२ ले जिताए ।
तर बार्सिलोनाले खुसीयाली मनाउँदा भ्यालेन्सियाका दर्शक भने रिसाएका छन् । दर्शकले नेमार र सुवारेजको टाउकोमा बोतल प्रहार गरेका छन् ।
त्यसपछि रिसाएका मेसीले दर्शकलाई गालीसमेत गर्न भ्याए ।
यो खेलमा घाइते भएका बार्सिलोना प्लेमेकर आन्द्रेस इनेस्ता घुँडाको लिगामेन्ट च्यातिएका कारण दुई महिना खेल्न नसक्ने भएका छन् ।
यो तनावपूर्ण खेलपछि ९ खेलबाट १९ अंक जोडेको बार्सिलोना शीर्ष स्थानमा पुगेको छ । ८ खेलका एथलेटिको मड्रिड र रियल मड्रिड दोस्रो र तेस्रो स्थानमा खसेका छन् ।
शनिबार रातिका अन्य खेलमा रियल सोसिडाडले एल्भेसलाई ३–० ले हराउँदा स्पानियोल र आइबरले ३–३ को तथा ग्रानाडा र स्पोर्टिङले गोलरहित बराबरी खेले ।
