लण्डन । लिभरपुल इङलिश लिग कप फुटबलको क्वार्टरफाइनलमा प्रवेश गरेको छ । मंगलबार राति भएको खेलमा अर्को इङलिश प्रिमियर क्लव टोटनह्याम हटसपरलाई २–१ ले हराउँदै लिभरपुल क्वार्टरफाइनलमा पुगेको हो ।
खेलको ९ मिनेटमै डानियल स्टुरिजले गोल गर्दै घरेलु मैदानमा लिभरपुललाई अग्रता दिलाए ।
६४ औं मिनेटमा स्टुरिजले अर्को गोल थप्दै अग्रतालाई दुई गुना पारे ।
इरिक लामेलाले फल खेलेपछि पाएको पेनाल्टीलाई ७६ औं मिनेटमा भिन्सेन्ट जान्सेनले गोल गर्दै टोटनह्यामलाई अन्तर कम गराए ।
त्यसपछि थप गोल नहुँदा लिभरपुल विजयी भयो । तर खेलमा लिभरपुलले एक दर्जन गोल गर्ने अवसर गुमाएको थियो । स्टुरिजलेसमेत ह्याट्रिक गर्ने थुप्रै अवसर पाएका थिए ।
त्यस्तै आर्सनल पनि क्वार्टरफाइनलमा पुगेको छ । आर्सनलले घरेलु मैदानमा रिडिङलाई सहजै २–० ले हराएको हो । आर्सनललाई विजयी गराउन दुबै गोल अलेक्स अक्सलेड चेम्बरलिनले गरे ।
लिग कप फुटबलका अन्य खेलमा न्युकासल युनाईटेडले प्रेस्टनलाई ६–० ले, हल सिटीले ब्रिस्टोल सिटीलाई २–० ले तथा लिड्स युनाइटेडले पेनाल्टी सुटआउटमा नर्विच सिटीलाई ३–२ ले हराउँदै क्वार्टरफाइनलमा स्थान पक्का गरेको छ ।
लिग कप फुटबलमा बुधबार राति तीन खेल हुँदैछन् । सबैभन्दा ठूलो भिडन्त म्यानचेस्टर युनाइटेड र म्यानचेस्टर सिटीबीच हुनेछ । त्यस्तै चेल्सी र वेष्ट ह्याम युनाइटेड तथा साउथह्याम्पटन र सण्डरल्याण्ड आपसमा भिड्ने छन् ।
