काठमाडौं । सर्वाधिक पुरस्कार राशिको रेडबुल राष्ट्रिय लिग फुटसलमा रजनी फुटसलले विजयी भएको छ । ह्वाइट हर्स फुटसल सुकेधारामा भएको समूह ए’को खेलमा रजनी फुटसलले ह्वाइट हर्सलाई ३–१ गोल अन्तरले पराजित गरेको हो ।
जारी लिगमा हालसम्म ५ खेलेको रजनी फुटसल ७ अंक जोड्दै समूह ए’को तेस्रो स्थानमा उक्लिएको छ । ४ खेलबाट ७ अंक जोडेको बानेश्वर रिक्रियसन सेन्टर पनि समान ७ अंक जोडेर गोल अन्तरका आधारमा रजनीभन्दा एक स्थान अघि छ । १२ अंक जोडेको किकअफ फुटसल समूहको शीर्ष स्थानमा छ ।
आजै भएको अर्को खेलमा हरिसिद्धि र ताहाचल फुटसलले बराबरी खेले । ललितपुरको हरिसिद्धिस्थित हरिसिद्धि फुटसलको होम ग्राउन्डमा भएको खेलमा समूह बी’मा रहेको हरिसिद्धिले ताहाचल फुटसलसंग ३–३ गोलको बराबरी खेलेको हो ।
५ खेल खेलेको ताहाचल १० अंकसहित शीर्ष स्थान पुग्दा समान ५ खेलबाटै ८ अंक मात्रै बटुलेको हरिसिद्धि दोस्रो स्थानमा छ । होम एण्ड अवेको आधारमा मंसीर २८ गतेसम्म सञ्चालन हुने लिगमा काठमाडौं, ललितपुर र भक्तपुरका गरी १६ फुटसल टोली सहभागि छन् ।
लिगको विजेता टोलीले १० लाख र उपउपविजेताले ५ लाख पाउने छ । यस्तै, प्रतियोगिताको उत्कृष्ट खेलाडी र उत्कृष्ट गोलरक्षकले जनही ५० हजार पाउने छन् ।
