काठमाडौं । इजरेलले आतङ्ककारी समूह हमासविरुद्धको आक्रमणलाई तीव्र बनाएको छ।
प्यालेस्टिनी आतङ्कवादी सङ्गठन विरुद्ध निर्णायक युद्धमा इजरेलले तीन लाख रिजर्भ सैनिक पनि खटाएको छ ।
गाजा पट्टीको घेराबन्दीका कारण तेस्रो दिन पनि विद्युत्, इन्धन र खाद्यवस्तुको आपूर्ति बन्द भएको छ ।
यसैको दबाबमा हमासले युद्ध विरामको प्रस्ताव गरेको छ ।
वरिष्ठ नेता मुसा अबु मारजुकले लक्ष्य हासिल भएको र इजरेलसँग सम्भावित युद्ध विराममा वार्ता गर्न तयार रहेको बताएका छन् ।
गाजा पट्टीसँग जोडिएको दक्षिणी इजरेलका शहर र बस्तीहरूमा हमासका आतङ्ककारी हरूको खोजी जारी राखेको छ।
युद्धमा दुवै पक्षबाट अहिलेसम्म १ हजार ५ सय ८७ जनाको ज्यान गएको छ । हमासको आक्रमणमा १० नेपालीले पनि ज्यान गुमाएका छन् । उनीहरुको शव ल्याउन सरकारले प्रक्रिया थालेको छ ।
इजरेलमा मात्रै ७३ सुरक्षाकर्मीसहित ९ सय जनाको ज्यान गएको छ भने गाजा स्ट्रिपमा इजरेलको प्रतिकारात्मक कारबाहीमा ६८७ प्यालेस्टिनीले ज्यान गुमाएका छन् ।
इजरेली सेनाका प्रमुख प्रवक्ता रियर एडमिरल ड्यानियल हगारीले दक्षिणी इजरेलका २४ क्षेत्रमध्ये १५ वटा हमासको नियन्त्रणबाट खाली गरिसकिएको र बाँकीलाई २४ घण्टाभित्र मुक्त गरिने बताए ।
काँडेबार तोडेर आतङ्ककारी प्रवेश गरेका ठाउँमा ट्याङ्की तैनाथ गरिएको हगरीले बताए । ड्रोन मार्फत घुसपैठ अनुगमन भइरहेको छ।
हालसम्म तीन लाख रिजर्भसहित करिब पाँच लाख सैनिक खटाइएको छ ।
