काठमाडौं। ईङलिश प्रिमियर लिग अन्तर्गत भएका खेलहरुमा लिभरपुल, आर्सनल, म्यानचेस्टर सिटी बिजयी भएका छन् भने जोसे मोरिन्होको म्यानचेस्टर युनाईटेडले वर्नलेसँग बराबरी खेल्दा अंक बाँड्न बाध्य भएको हो।
लिभरपुलले क्रिस्टल प्यालेसलाई ४-२ गोलले पराजित गरेको थियो। रोमाञ्चक खेलमा लिभरपुल बिजयी भएको हो। पहिलो हाफ सकिंदासम्म ३-२ गोलले अग्रता लिएको लिभरपुलले दोस्रो हाफमा थप १ गोल गरेको थियो।
लिभरपुलका एम्रे कानले १६औं मिनेटमा गोल गरेका थिए भने त्यस्को २ मिनेट पछि प्यालेसका जेम्स मकअर्थरले गोल फर्काएका थिए। २१औं मिनेटमा लिभरपुलका लोभरेनले गोल गरे भने ३३औं मिनेटमा मकअर्थरले प्यालेसकालागि दोस्रो गोल थपेका थिए।
४४औं मिनेटमा लिभरपुलका जोएल माटिपले गोल गर्दै ३-२को अग्रता दिलाएका थिए। खेलको ७१औं मिनेटमा चौथो गोल गर्दै रोबर्टो फर्मिनोले ४-२को अग्रता दिलाएका थिए। उक्त स्कोर नै निर्णायक भएको थियो।
आर्सनलकालागि एलेक्सी सान्चेज र ओलिभर जिराउले २-२ गोल गर्दै सण्डरल्याण्ड बिरुद्ध ४-१को जित हात पारेका थिए। १९ औं मिनेटमा सान्चेजले आर्सनलकालागि खाता खोलेका थिए। ६५औं मिनेटम सण्डरल्याण्डका जेरोमी डेफोले गोल गर्दै खेल १-१को बराबरीमा पुर्याएका थिए।
त्यसपछि आक्रमक बनेको आर्सनलले ७१, ७६ र ७८औं मिनेटमा गोल गर्दै खेल एकतर्फी बनाएका थिए।
म्यानचेस्टर सिटीले वेस्ट ब्रोमविचलाई ४-० गोलले पराजित गर्दै अंक तालिकामा पहिलो स्थान कायमै रहेको छ। १० खेलमा २३ अंकका साथ सिटी पहिलो स्थानमा रहेको छ भने आर्सनल र लिभरपुल पनि समान खेलमा समान अंकका साथ दोस्रो र तेस्रो स्थानमा रहेका छन्।
