एजेन्सी । नाम चलेका क्लबहरु आर्सनल, पेरिस सेन्ट जर्मेन पीएसजी, एथ्लेटिको मड्रिड र बायर्न म्युनिख युरोपियन च्याम्पियन्स लिग फुटबलको नकआउट चरणमा पुग्दा बार्सिलोनाले लज्जास्पद हारे व्यहोरेको छ ।
स्पेनिश लिग ला लिगामा समेत संघर्ष गरिरहेको बार्सिलोनाले इङ्गलिश क्लब म्यान्चेस्टर सिटीसँग मंगलबार राति ३–१ को लज्जास्पद हार व्यहोरेको हो । च्याम्पियन्स लिगमा बार्सिलोनाको यो पहिलो हार हो । यसअघिका तीन खेल भने उसले जितेको छ । तीन खेलबाट ९ अंक जोडेको बार्सिलोना शीर्ष छ भने गोल अन्तर भने अरुको तुलनामा निकै माथि छ ।
खेलमा सिटीका लागि ईके गुन्डोगानले दुई तथा केभिन डे ब्रायनले एक गोल गरे । । पराजित टोली बार्सिलोनाका स्ट्राइकर लियोनल मेस्सीले एक गोल फर्काए । यसैबीच, बुल्गेरियाको लुदोगोरेट्स राज्गार्डलाई ३–२ ले हराउँदै इङलिश क्लब आर्सनलले (राउण्ड अफ सिक्सटिन) अन्तिम १६ मा स्थान पक्का गरेको छ ।
आर्सनललाई विजयी गराउन ग्रानिट झाका, ओलिभर जिरु र मेसुत ओजीलले १–१ गोल गरे । सोही समूहको अर्को खेलमा स्वीट्जरल्याण्डको एफसी बाजललाई २–१ ले हराउँदै फ्रान्सको पेरिस सेन्ट जर्मेन पिएसजी समेत अन्तिम १६ मा पुगेको छ ।
च्याम्पियन्स लिगको समूह डी बाट एथ्लेटिको मड्रिड र बायर्न म्युनिख नक आउट चरणमा पुगेका छन् । स्पेनको एथ्लेटिको मड्रिडले रुसको एफसी रुस्तोभलाई २–१ ले हराउँदा जर्मनीको बायर्न म्युनिखले नेदरल्याण्ड्सको पिएसभी आईन्दोभेनलाई २–१ ले पराजित गर्यो ।
पोर्चुगलको बेनिफिकाले युक्रेनको डाईनामो किभलाई १–० ले हराउँदा टर्कीको बेसिक्टास र ईटालीको नापोलीले १–१ गोलको बराबरी खेले ।
