काठमाडौँ । राष्ट्रिय खेलकुद परिषद् (राखेप) ले तेक्वान्दो प्रशिक्षक दीपक विष्टलाई राष्ट्रिय टिम तयारीको निर्देशकको जिम्मेवारी दिएको छ । यसअघि तालिम तथा प्रशिक्षण विभागमा रहेका विष्टलाई शनिबार राष्ट्रिय टिम तयारीको निर्देशकको जिम्मेवारी दिने निर्णय गरिएको हो ।
नेपाली खेलकुदका सफल खेलाडी मध्येका एक विष्ट दक्षिण एसियाली खेलकुद (साग) को लगातार चार संस्करणमा स्वर्ण जित्ने एक मात्र नेपाली खेलाडी हुन् ।
उनले आठौँदेखि ११ औँ (साग) सागमा स्वर्ण जितेका थिए । विष्टले २००२ को बुसान एसियाड तथा २००६ को दोहा एसियाडीमा कास्य जितेका थिए ।
विष्ट ओलम्पिकमा छनोट भएर खेल्ने दोस्रो नेपाली खेलाडी हुन् । उनले सन् २००८ मा चीनको बेइजिङ भएको २९ औँ ओलम्पिक छनोट चरण पार गरेर खेलेका थिए ।
तेक्वान्दो प्रशिक्षक संगीना वैद्य छनोट चरण पार गरेर ओलम्पिक खेल्ने पहिलो नेपाली खेलाडी हुन् ।
विष्ट २०६५ साल साउन २० गते राखेपमा तेक्वान्दो प्रशिक्षकको रुपमा सेवा प्रवेश गरेका थिए ।
