काठमाडौँ । कीर्तिमानधारी ओलम्पियन संगीना वैद्यले राष्ट्रिय खेलकुद परिषद् (राखेप) को‌ तालिम तथा प्रशिक्षण विभागको‌ उपनिर्देशक राजीनामा दिएकी छिन् ।

राष्ट्रिय खेलुकद परिषदले आफूभन्दा जुनियरलाई निर्देशक बनाएपछि अपमान भएको महसुस गर्दै उनले आइतबार राखेप सदस्यसचिव टंकलाल घिसिङलाई राजीनामा बुझाएकी हुन् । 

सन् २००४ को एथेन्स ओलम्पिकमा पहिलो पटक छनोट चरण पार गरेर ओलम्पिक खेल्न सफल तेक्वान्दो प्रशिक्षक संगीना झण्डै दुई वर्षदेखि उपनिर्देशक छिन् ।

तर उनलाई निर्देशक बनाउनुको सट्टा राखेपले उनीभन्दा जुनियर कराँते प्रशिक्षक सोभितराज प्रसाईंलाई निर्देशकको जिम्मेवारी दिएपछि उनले राजीनामा दिएकी हुन् । 

तालिम तथा प्रशिक्षण विभागका तत्कालीन निर्देशक प्रचण्ड शर्माले गत भदौ १९ गते अनिवार्य अवकाश पाएपछि रिक्त रहेको पदमा राखेपले प्रसाईंलाई सो‌ पदको जिम्मेवारी दिइएको थियो ।

उनी भन्छिन्, ‘निर्देशकको पद रिक्त भएपछि त उप‌निर्देशकहरु मध्येबाट बनाउनु पर्यो नि मभन्दा जुनियरलाई निर्देशक बनाएपछि म पदमा बसिरहन मेरो नैतिकताले दिएन । त्यसैले राजीनामा गर्न बाध्य भएकी हुँ ।’

खेलाडी जीवनदेखि अनुशासित संगीना अहिलेसम्म कुनै पनि विवादमा आएकी छैनिन् । अनुशासनलाई नै खेलुकदको आदर्श भएको बताउँदै आएकी संगीनामाथि नै यसरी कू होला भन्ने उनले सोचेकै थिइनन् । 

उनले भनिन्, ‘खेलकुदमा बेथिति छ यसलाई सफा गर्नुपर्छ भनेर पहिलेदेखि नै लागियो । अहिले पो अपमान गरेर पुरस्कार दिएजस्तो भयो ।’

हाल उपनिर्देशकमा एसियन तेक्वान्दोमा स्वर्ण तथा दक्षिण एसियाली खेलकुदमा दुई स्वर्ण पदक जितेकी संगीना र अर्का ओलम्पियन विष्णुबहादुर सिंह छन् । तर दुवै जनाभन्दा बाहिर गएर राखेपले प्रसाईंलाई निर्देशक बनाएको हो । 

हुनत राखेपले तालिम तथा प्रशिक्षण विभागमा अहिलेसम्म महिलालाई निर्देशकको‌ जिम्मेवारी दिएको छैन । त्यही साँघुरो सोचले हो वा पूर्वाग्रही भएर हो राखेपले विधि र विधान मिचेको स्पष्टै छ । 

प्रसाईंको प्रवेश संगीनाको भन्दा अगाडि भए पनि संगीना भने पहिले अधिकृत भएकाले पनि उनी सिनियर हुन् । 

संगीना २०५२ साल भदौ ३० गते राखेपको सेवामा प्रवेश गरकी थिइन् । उनी २०६३ साल पुस २१ गते बढुवा भएकी थिइन् । २०५० साल असोज ८ गते ३ गने करारमा राखेपमा प्रवेश गरेका प्रसाईंको‌ भने संगीनाको भन्दा एक वर्ष ढिला पदोन्नती भएको थियो । 

प्रसाईंको २०६४ साल पुस २७ मा बढुवा भएको थियो ।

सदस्य सचिवले जवाफ दिनुपर्ने 
राष्ट्रिय खेलकुद परिषदको अध्यक्ष मन्त्री हुन्छ । युवा तथा खेलुकद मन्त्री तेजुलाल चौधरीले भने यसबारेमा आफूलाई केही पनि जानकारी नभएको बताएका छन् । 

उनले भने, कहाँ मैले त्यस्ताे गर्छु । राखेपले गर्याे कि के हाे ? मलाई थाहा भएन बुझ्छु म ।'

यसको मतलब सदस्य सचिव टंकलाल घिसिङले आफू मातहतबाट जुनियरलाई निर्देशक बनाउने काम भएको स्पष्ट छ । 

उनी नैतिकताको घेरामा परिसकेका छन् । अब उनले आफूले गरेको गल्ती सच्याउँछन् कि पेलेरै अगाडि बढ्लान् भन्ने भोलिका दिनले देखाउँछ । 

खेलकुदमा अनुशासन हुने हुनाले अनुशासन, विधि र विधान कसैले तोड्न पाइँदैन । तसर्थ उनले गल्ती सच्याउँछन् कि इमानको कठघरामा उभिन्छन् भन्ने प्रश्न गम्भीर बनेको छ ।