बेल्जियम । विश्वकप छनोट फुटबलको युरोपेली समूह अर्थात् युएफा छनोटमा बेल्जियम, नेदरल्याण्डस र पोर्चुगल विजयी भएका छन् ।
आइतबार राति भएका खेलमा बेल्जियमले घरेलु मैदानमा इस्टोनियालाई ८–१ को भारी अन्तरले हरायो ।
समूह एच मा रहेको बेल्जियमलाई जिताउन ड्राइस मेर्टेन्स र रोमेलु लुकाकुले दुई दुई गोल गरे ।
त्यस्तै थोमस मुनियर, एडन हजार्ड र कारास्कोले एक एक गोल गर्दा बेल्जियमले एक गोल उपहारका रुपमा इस्टोनियाबाट आत्मघातीका रुपमा पाएको थियो ।
समूह एच कै अन्य खेलमा साइप्रसले जिब्राल्टारलाई ३–१ ले हराउँदा ग्रीस र बोस्निया हर्जगोविनाले १–१ को बराबरी खेले ।
त्यस्तै समूह ए को खेलमा नेदरल्याण्डसले लक्जेम्बर्गलाई ३–१ ले हरायो । मेन्फिस डेपेले दुई गोल गरे भने आर्जेन रोबेनले एक गोल गरे ।
यो समूहको अर्को खेलमा बुल्गेरियाले बेलारुसलाई १–० ले हरायो ।
समूह बी को खेलमा हंगेरीले अन्डोरालाई ४–० ले, स्वीजरल्याण्डले फारोइ आइल्याण्डलाई २–० ले तथा पोर्चुगलले लात्भियालाई ४–० ले हरायो ।
पोर्चुगललाई विजयी गराउन क्रिष्टियानो रोनाल्डोले दुई तथा विलियम कार्भाल्हो र बु्रनो एल्भेसले एक एक गोल गरे ।
