अर्जेन्टिना । विश्बकप छनोट फुटबलमा अर्जेन्टिना विजयी भएको छ । यसअघिको खेलमा ब्राजिलसंग उसकै मैदानमा पराजित भएपछि आलोचित बनेको अर्जेन्टिनाले बुधबार बिहान भएको खेलमा कोलम्बियालाई ३–० ले हरायो ।
घरेलु मैदानमा अर्जेन्टिनालाई जिताउने क्रममा लिओनल मेसी, लुकास प्राटो र एन्जल डी मारियाले एक एक गोल गरे ।
यो जितले पूर्व विश्वकप च्याम्पियन अर्जेन्टिनाले विश्वकपमा छनोट हुने आशालाई फराकिलो पारेको छ ।
ब्राजिलसंगको हारपछि मेसीले टिम अंक तालिकामा तल गए पनि नबाहिरिएको भन्दै खेलाडीलाई उत्साही बनाउने काम गरेका थिए ।
विश्वकप छनोटको अर्जेन्टिनाको समूहका अन्य खेलमा बोलिभियाले पाराग्वेलाई १–० ले, इक्वेडरले भेनेजुएलालाई ३–० ले, चिलीले उरुग्वेलाई ३–१ ले हरायो । ब्राजिलले पेरुलाई २–० ले हराएको छ । ब्राजिलका लागि गाब्रियल जेसस र रेनाटो अगस्टोले एक एक गोल गरे ।
१२ औं चरणको समाप्तिसम्म शीर्ष स्थानको ब्राजिलको २७ अंक भएको छ । उरुग्वे २३ अंकसहित दोस्रो, इक्वेडर २० अंकसहित तेस्रो, २० अंकबाटै चिली चौथो तथा १९ अंकबाट अर्जेन्टिना पाँचौं स्थानमा चढेको छ ।
